მსოფლიოს ჩემპიონატის ჯგუფური ეტაპის დამთავრების შემდეგ ფიფამ გამოაქვეყნა ყველაზე ძლიერი დარტყმებით გატანილი გოლების ჩამონათვალი. ეს შესაძლებელი გახდა „ადიდასის” Al Rilha-ს ბურთებში ჩამონტაჟებული ტექნოლოგიის საშუალებით. გთავაზობთ უძლიერესი შედეგიანი დარტყმების ათეულს, სადაც ბოლო თხუთმეტწლეულის უდიდესი ფეხბურთელების კრიშტიანუ რონალდუსა და ლეო მესის დარტყმებიც შედის.
1 ლუის ჩავესი(მექსიკა) — 121,69 კმ/სთ
ეს გახლავთ მექსიკელთა მეორე გოლი საუდის არაბეთის კარში. შეხვედრა დასრულდა მექსიკის გამარჯვებით 2:1. ჩავესმა მარცხენა ფეხით დაარტყა საჯარიმოდან, რომელიც კარიდან 30 მეტრში დაინიშნა.
2 რიცუ დოანი (იაპონია) — 120,04 კმ/სთ
ამ გოლით იაპონელებმა ესპანეთთან შეხვედრაში ანგარიში გაქვითეს. დოანმაც მარცხენა ფეხით შეაგდო. თამაში დასრულდა იაპონელების გამარჯვებით 2:1.
3 ნიკლას ფულკრუგი (გერმანია) — 118 კმ/სთ
„ვერდერის” 29 წლის თავდამსხმელმა ეს გოლი ესპანეთს გაუტანა. შეხვედრა დასრულდა 1:1. ფულკრუგმა მარჯვენა ფეხით შეაგდო.
4 კრიშტიანუ რონალდუ (პორტუგალია) — 117,39 კმ/სთ
ლაპარაკია პენალტზე, რომელიც მსოფლიოს ხუთგზის საუკეთესო ფეხბურთელმა განას მარჯვენა ფეხით გაუტანა. შეხვედრა დასრულდა 3:2 პორტუგალიის გამარჯვებით.
5 მარკუს რეშფორდი — 115,63 კმ/სთ
რეშფორდმა მარჯვენა ფეხით შესრულებული ამ საჯარიმო დარტყმით უელსთან შეხვედრაში ანგარიში გახსნა. ინგლისმა მოიგო 3:0.
6 გარეთ ბეილი (უელსი) — 113,89 კმ/სთ
ისევე, როგორც ბეილის ყოფილი თანაგუნდელის კრიშტიანუ რონალდუს შემთხვევაში, ამჯერადაც ლაპარაკია პენალტზე, რომელიც უელსელმა აშშ-ს გაუტანა. მან მარცხენა ფეხით 82-ე წუთზე გაქვითა ანგარიში. შეხვედრა დასრულდა 1:1.
7 იუსეფ ენ-ნესირი (მაროკო) — 113,23 კმ/სთ
ეს გოლი გავიდა შეხვედრაში, რომელიც მაროკომ კანადას 2:1 მოუგო. ენ-ნესირიმ 23-ე წუთზე თავისი გუნდის მეორე გოლი შეაგდო. მან მიზანს მოძრაობაში, მარჯვენა ფეხით მიაღწია.
8 კოდი გაკპო (ნიდერლანდები) — 111,98 კმ/სთ
ჰოლანდიისა და ეკვადორის შეხვედრა 1:1 დამთავრდა. გაკპომ ანგარიში მე-6 წუთზე საჯარიმოს კიდიდან მარცხენა ფეხით შეაგდო და ანგარიში გახსნა.
9 ლეო მესი (არგენტინა) — 109,83 კმ/სთ
არგენტინამ მექსიკას 2:0 მოუგო და ამ გამარჯვების წყალობით მას მოეხსნა ის წნეხი, რომელიც საუდის არაბეთთან წაგების გამო აწვებოდა. ლეომ პასი დი მარიასგან მიიღო და 25 მეტრიდან მარცხენა ფეხით გაიტანა.
10 კარლოს სოლერი (ესპანეთი) — 105,81 კმ/სთ
ესპანეთმა კოსტა რიკას 7:0 მოუგო. გიორგი მამარდაშვილის ყოფილმა თანაგუნდელმა კარლოს სოლერმა მეექვსე გოლი ნიკო ვილიამსის პასით ახლო მანძილიდან შეაგდო. მაყურებელი ვერც იფიქრებდა, რომ ბურთი ასე სწრაფად გაფრინდა.
