რობერტ ლევანდოვსკის მომავალი უცნობია. ჯერ არ გადაწყვეტილა დარჩება 37 წლის პოლონელი „ბარსელონაში’’ თუ არა. თავდამსხმელის კარიერის მომდევნო ეტაპის შესახებ საყურადღებო განცხადება მისმა ცოლმა, კარატისტმა, მსოფლიოს სამგზის და ევროპის ექვსგზის მედალოსანმა ანა ლევანდოვსკამ პოლონურ „პლეადასთან’’ ინტერვიუში გააკეთა.
„დავაკვირდებით, როგორ გავა ეს სეზონი „ბარსელონაში’’. ჯერჯერობით ისე ჩანს, რომ ის ჩემი მეუღლისთვის ამ გუნდში ბოლო იქნება. ჩვენ უკვე ყოველი წუთისგან მაქსიმუმი უნდა გამოვწუროთ, ყოველი მომენტით, ყოველი მატჩით, გულშემატკივრებთან ყოველი შეხვედრით უნდა ვისიამოვნოთ. იმედი მაქვს, რომ მის სახელს კატალონიელი ქომაგი ჯერ კიდევ ბევრი წლის განმავლობაში ახსენებს. მას თაობები არ დაივიწყებენ. მართალია მისი კარიერის დასასრული ახლოვდება, მაგრამ ეს ჯერჯერობით ბოლო არ არის’’, ― თქვა ანა ლევანდოვსკამ.
