NBA-ს მორიგი სათამაშო დღეს ორივე ქართველის გუნდმა ითამაშა, მაგრამ მოედანზე მხოლოდ ერთი გამოჩნდა.
„ორლანდო მეჯიქმა“ სტუმრად „პორტლენდს“ 110:106 მოუგო. გოგა ბითაძეს არ უთამაშია. როგორც ირკვევა, ჩვენებურს მუხლის ტრავმა აწუხებს. თუმცა, მისი ხარისხი უცნობია.
„ორლანდოს“ 17 მოგების წილ 13 მარცხი აქვს და აღმოსავლეთ კონფერენციაში მეექვსე ადგილზეა. მომდევნო მატჩს კი, 27 დეკემბერს, შინ, „შარლოტთან“ ითამაშებს.
სანდრო მამუკელაშვილის „ტორონტო რეპტორსი“ მაიამის ესტუმრა და 112:91 იმარჯვა. ჩვენებური ძირითად შემადგენლობაში იყო და სამმაგ დუბლთან იტრიალა. 27.29 წუთში მამუკელაშვილმა 14 ქულა, 6 მოხსნა, 7 პასი და 1 ჩაჭრა მიითვალა.
სანდრომ სამიდან ერთი ორქულიანი, ექვსიდან ოთხი სამქულიანი ჩააგდო. პასივში ერთი დაკარგვა ჰქონდა, მისი მოედანზე ყოფნისას კი, კანადელებმა მეტოქეზე 19 ქულით მეტი ჩააგდეს, რაც გუნდში მესამე მაჩვენებელი იყო. „ტორონტოს“ 18 მოგება და 13 მარცხი აქვს. ეს აღმოსავლეთ კონფერენციაში მეოთხე მაჩვენებელია. 27 დეკემბერს „ტორონტო ვაშინგტონს“ ესტუმრება.
