მადრიდული გაზეთი გვატყობინებს, რომ დღევანდელი მატჩი რთულ მეტეოროლოგიურ პირობებში გაიმართება. გარდა ამისა, გადატვირთული გრაფიკი ძლიერ მოქმედებს როგორც ახლგაზრდა ასევე გამოცდილი ფეხბურთელების ჯანმრთელობაზე. ესპანეთის ნაკრების ბანაკს ბოლოს ოლმო გამოაკლდა. სამედიცინო შემოწმებამ აჩვენა, რომ მას ეგრეთწოდებული კუნთის გადაღლა აწუხებს.
მოხშირებული ტრავმების მიუხედავად ესპანეთის ნაკრების მწვრთნელი ლუის დე ლა ფუენტე ჭიქას ნახევრად სავსედ აღიქვამს. მისი ყურადღება შესარჩევ ტურნირს სცდება და უკვე მუნდიალის ფინალური ეტაპისკენ არის მიპყრობილი: „ მე ივნისის ამბავი მაწუხებს, როდესაც ჯანმრთელობის პრობლემები ერთად მოიყრის თავს. მირჩევნია ჯანმრთელი ფეხბურთელების სიჭარბე მქონდეს და მათ შორის არჩევა იყოს ჩემი პრობლემა’’.
დღეს ესპანეთის ნაკრები მოედანზე ჩვეული შემადგენლობით ვერ გავა. დე ლა ფუენტეს თვითმფრინავს ფრთები ნიკო უილიამსი და ლამინ იამალი აკლია. ნიკო ბოლომდე არ გამოჯანმრთელებულა, ლამინს კი საზარდული აწუხებს. შეგახსენებთ, რომ იამალმა 2023 წლის 8 სექტემბერს ნაკრებში პირველი გოლი სწორედ საქართველოს გაუტანა. იმ დღეს ის გახდა ყველაზე ახალგაზრდა ფეხბურთელი და გოლის ავტორი „ლა როხას’’ ისტორიაში.
ბოლოს AS-ს საქართველოს ნაკრების თავკაცის ვილი სანიოლის სიტყვები მოჰყავს: „დღეს ესპანეთსა და ჩვენ შორის სხვაობა კოლოსალურია’’. ხვიჩა კვარაცხელიას ბარძაყის ტრავმა ჰქონდა, მაგრამ გიორგი მამარდაშვილი და ჟორჟ მიქაუტაძის ინსტინქტი ესპანელებს შეახსენებს, რომ ზედმეტად თავდაჯერებულნი არ უნდა იყვნენ.
