ჩხუბი თბილისში, კრიზისი – თელავში

ეროვნული ლიგის მე-17 ტურის მთავარ მატჩში, „ქართულ კლასიკოში“ თბილისის „დინამოსა“ და ქუთაისის „ტორპედოს“ შორის, შეხვედრის დამთავრების შემდეგ იშვიათი ამბავი მოხდა, მინდორზე გუნდური ჩხუბი ატყდა, რის გამოც მსაჯმა გიორგი ყრუაშვილმა 9 (!) ფეხბურთელი გააძევა – 5 „დინამოდან,“ ოთხი – „ტორპედოდან…“

რაც შეეხება საკუთრივ თამაშს, ის დინამოელებმა დამსახურებულად მოიგეს 2:0 და პირველ წრეში მარცხისთვის სრულფასოვანი რევანში აიღეს (მაშინ, 13 აპრილს, „ტორპედომაც“ ამავე ანგარიშით გაიმარჯვა).

ამრიგად, დინამოელებმა „ტორპედოს“ ზედიზედ ხუთმოგებიანი სერია შეყვიტეს, 29 ქულა მოაგროვეს და ისევ მესამე ადგილზე დაბრუნდნენ. 27-ქულიანი „ტორპედო“ კი ცხრილში მეოთხეა, თუმცა მეხუთეადგილოსან „ბათუმსაც“ ამდენივე ქულა აქვს და იმერლები მათ ბურთების უკეთესი ბალანსით უსწრებენ.

ეს „დინამოს“ 50-ე გამარჯვება გახლდათ „ტორპედოსთან“ საქართველოს ჩემპიონატების ისტორიაში.

მოიგო „დილამაც.“ გორელებმა ფოთში „კოლხეთს“ სძლიეს – 2:1. ორივე გუნდმა გააცუდა პენალტი, ჯერ ფოთელმა აბუაშვილმა, შემდეგ გორელმა დრამემ. თუმცა აბუაშვილმა დამატებაზე მაინც გაიტანა.

ლიდერმა „იბერიამ“ კი „გარეჯთან“ ვერ მოიგო (1:1), 41 ქულა მოაგრივა და ახლა 6 ქულითღა უსწრებს უშუალო მდევარ „დილას.“

„სამგურალმა,“ რომელსაც ბოლო 7 შეხვედრიდან 6 წაგებული ჰქონდა, ნავსი გატეხა და „ბათუმს“ დიდი ანგარიშით 3:0 სძლია. დუბლი შეასრულა ფანცულაიამ, ლუკა ხორხელმა კი გოლიც გაიტანა და საგოლე გადაცემითაც გამოირჩა.

„თელავი“ ისევ დამარცხდა და ჯერჯერობით გავარდნის ყველაზე რეალურ კანდიდატად ჩანს. კახური კლუბის კრიზისი აშკარაა – მათ 11-მატჩიანი მოუგებელი სერია აქვთ და ცხადია, ბოლო ადგილზე დგანან.

კოლხეთი 1:2 დილა

0:1 ანდრონიკაშვილი (37), 1:1 აბუაშვილი (45+8), 1:2 ფარულავა (80)

დინამო 2:0 ტორპედო

1:0 მორჩილაძე (8), 2:0 ასუნსეუ (52)

გაძევება: მორჩილაძე, ხვადაგიანი, ოდიკაძე, ბერელიძე, მაქაცარია – დინამო; პირესი, პიმენტელი, კამარგო, ზიტა – ტორპედო. ყველა 90+5

გაგრა 3:0 თელავი

1:0 ბორჟესი (59), 2:0 ხარებაშვილი (84), 3:0 კაციაშვილი (90+4)

სამგურალი 3:0 ბათუმი

1:0, 2:0 ფანცულაია (12, 42), 3:0 ლუკა ხორხელი (60 პენ)

გარეჯი 1:1 იბერია

0:1 სილაგაძე (8), 1:1 გოგოლაშვილი (86)