ფრანსუა ლეტექსიე შეცდა და ეს მისმა ხელმძღვანელებმა აღიარეს. ფრანგ მსაჯთა ტექნიკურმა მენეჯმენტმა ლიგა 1-ის ოცდამეათე ტურის შემაჯამებელ დოკუმენტში დაწერა, რომ კვირას „სენტ ეტიენსა’’ და „ლიონს’’ შორის გამართულ შეხვედრაში არბიტრს მასპინძელთა ფეხბურთელი ლუკა სტასენი, რომელიც მატჩის საუკეთესო ფეხბურთელი გახდა, პირველი ტაიმის შუაში კორენტენ ტოლისოს წინააღმდეგ უხეშობის გამო უნდა გაეძევებინა. შეგახსენებთ, რომ ლეტექსიემ სტასენს თავიდან წითელი ბარათი ამოუღო, მაგრამ შემდეგ ეპიზოდი VAR-ზე ნახა და გაძევება გაფრთხილებით შეცვალა. დაშავებული ტოლისო მოედნიდან გაიყვანეს.
მსაჯთა დეპარტამენტს მიაჩნია, რომ სასურველი იყო მსაჯისთვის (რომელმაც რამდენიმე დღით ადრე ჩემპიონთა ლიგის მეოთხედფინალური შეხვედრა იმსაჯა „რეალსა’’ და „არსენალს’’ შორის) ეჩვენებინათ სხვა რაკურსებიც, განსაკუთრებით მარცხენა ზუმ-კამერით შესრულებული ჩანაწერი, რომელზეც მომხდარი უფრო ზუსტად გამოჩნდა და ამ შემთხვევაში არბიტრი თავის პირველ გადაწყვეტილებას აღარ შეცვლიდა, სტასენისთვის ნაჩვენებ წითელ ბარათს არ გააუქმებდა.
ბელგიელ თავდამსხმელ ლუკა სტასენს ამ მომენტისთვის ერთი გოლი უკვე ჰქონდა გატანილი, მოგვიანებით კი მეორეც გაიტანა. „სენტ ეტიენმა’’ გაიმარჯვა: 2:1.
შეგახსენებთ, რომ მასპინძლეთა გუნდში თამაშობდა ზურიკო დავითაშვილი, ხოლო სტუმართა გუნდში ჟორჟ მიქაუტაძე.
