ევროპის 2025 წლის ჩემპიონატის საკვალიფიკაციო ტურნირში საქართველოს ნაკრებმა ფინეთი მეორედაც დაამარცხა და ცხრილში მეორე ადგილზე გამაგრდა.
ალეკსანდარ ჯიკიჩის გაწვრთნილმა გუნდმა სკანდინავიელებს თბილისში 17-ქულიანი მარცხი აგემა – 81:64. ჩვენმა ნაკრებმა უხეიროდ დაწყებული საკვალიფიკაციო ტურნირის შემდეგ სატურნირო ვითარება კი გამოისწორა, მაგრამ დამშვიდების უფლება არ აქვს, რადგან დანიის ნაკრებთან მომავალი თამაში აუცილებლად უნდა მოიგოს. განსხვავება მხოლოდ ის არის, რომ აქამდე თუ ევრობასკეტზე გასასვლელად დანიელებთან რვა ქულით ჯობნა გვმართებდა, ახლა ნებისმიერი ანგარიშით მოგებაც გვეყოფა. ეს თებერვალში, ახლა ფინეთთან თბილისურ მატჩს დავუბრუნდეთ, რომელიც თანაბარ ბრძოლაში დაიწყო, მაგრამ პირველი მეოთხედი სტუმრებმა 21:17 მოიგეს.
ისევ პრობლემა ჩანდა პერიმეტრტზე, მაგრამ ჩვენი გუნდის ლიდერებმა ამერიკელი ლეგიონერმა კამარ ბოლდუინმა და კაპიტანმა თორნიკე შენგელიამ თამაშს მოუმატეს, რისი წყალობითაც ალეკსანდარ ჯიკიჩის გუნდმა მეორე მეოთხედი უკეთ ჩაატარა, თუმც ტაიმი მაინც ფინელთა გამარჯვებით დასრულდა – 40:38. მესამე მეოთხედი ქულების მხრივ მწირი გამოდგა. ამ მონაკვეთში შეტევაზე უკეთ დაცვა გამოგვდიოდა და მეოთხედი საქართველომ 17:13 მოიგო. ეს ნიშნავდა რომ გადამწყვეტი პერიოდის წინ ჩვენი გუნდი იყო – 55:53.
ყველაფერი გადამწყვეტ პერიოდში მოხდა. საქართველომ მეტოქეს მთავარი დარტყმა შენგელიასა და დუდა სანაძის ზუსტი სროლებით მიაყენა, ხოლო ბოლდუინის შესანიშნავი ჩაჭრებისა და პასების შემდეგ საქართველო წინ 10 ქულით გავიდა. ამ მომენტიდან საქართველოს ნაკრები შეუჩერებელი გახდა და საბოლოოდ მატჩი გამარჯვებამდე მიიყვანა.
საქართველოს ნაკრებში ყველაზე მეტი, 25 ქულა თორნიკე შენგელიას ჰქონდა. მან 4 მოხსნა, 6 პასი და 2 ჩაჭრაც დააგროვდა; 22 ქულა, 9 მოხსნა, 6 პასი და 3 ჩაჭრა ბოლდუინის ანგარიშზეა; დუდა სანაძემ მატჩი 12 ქულით დაასრულა.
საქართველოს ნაკრები მორიგ მატჩს 21 თებერვალს თბილისში გამართავს, ხოლო დასკვნითი შეხვედრისთვის ჯგუფიდან უკვე გასულ სერბეთს, 24 თებერვალს ბელგრადში ესტუმრება. ევრობასკეტზე, როგორც მასპინძელი, ფინეთიც იქნება. ასე რომ, ჩვენ მხოლოდ დანიელების მოტოვება დაგვრჩენია და ევროპის ჩემპიონატის ფინალურ ეტაპზე მეექვსედ ვითამაშებთ…
