სალია და მისი რაზმი

ექვსი წელიწადია „ტორპედო“ თბილისში ვერ იგებს. ეს „ტრადიცია“ არც ამჯერად დაირღვა. ჭაბუკმა თბილისელებმა 16 წლისა და 193 დღის ვახო სალიას გოლით გაიმარჯვეს, რომელიც დავით პეტრიაშვილისა და ალექსანდრე იაშვილის შემდეგ მესამე ყველაზე ახალგაზრდა ფეხბურთელია, ვისაც „დინამოს“ მაისურით გაუტანია.

სალიამ ლამაზი თავური შეაგდო, შემდეგ ხარიხასაც მოარტყა ბურთი.

თამაშის წინ ფავორიტად ტორპედოელები მიიჩნეოდნენ, რადგან სეზონის წინ სოლიდური შევსება მიიღეს და არც მაღალ ამბიციებს მალავენ. თუმცა სამ ტურში ორჯერ დამარცხდნენ და ჯერჯერობით ვერაფერი სტარტი გამოუვიდათ.

აი, „ბათუმი“ და „დილა“ 100 პროცენტიანები არიან. 3 ტურის შემდეგ 3-3 გამარჯვება აქვთ და პირველ-მეორე ადგილებსაც იყოფენ. თან „დილა“ ერთადერთი გუნდია ლიგაში, ვისაც გოლი არ გაუშვია. რუი მოტას შეგირდების ასეთი სტსრტი ცოტა მოულოდნელია.

პირველად გაიმარჯვა ხუთი წლის შემდეგ ელიტაში დაბრუნებულმა „კოლხეთმა.“ ეგ არის, ფოთელები საშინაო მატჩებს საკუთარ სტადიონზე ვერ ატარებენ (მთავარი მიზეზი უხარისხო მინდორია) და ქობულეთის საფეხბურთო ცენტრში უწევთ თამაში.

ჯერჯერობით სეზონის იმედგაცრუება  „სამგურალია.“ სამივე თამაში წააგო და ერთადერთ გუნდია ლიგაში, რომელსაც გოლი არ გაუტანია. არადა, ბოლო წლებში  ევროზონისთვის მებრძოლ გუნდად დაგვამახსოვრეს თავი. ეგ კი არა, გასულ სეზონში ცოტა ხნით სატურნირო ცხრილსაც ლიდერობდნენ. მიხეილ აშვეთიას გვარიანი მუშაობა მოუწევს ვითარების გამოსასწორებლად.

იბერია 1999 2:2 სამტრედია

1:0 ნონიკაშვილი (21), 1:1 ჰაიდარი (37), 2:1 სილა  (63), 2:2 ფაჩულია (75)

დინამო 1:0 ტორპედო

1:0 სალია (33)

კოლხეთი 2:1 გაგრა

0:1 ლომთაძე (31), 1:1 კაკუბავა (44 საკ. კაში), 2:1 ლაშა კოხრეიძე (57)

დილა 1:0 თელავი

1:0 ვაუტერი (36)

გაძევება: ქურდაძე (34)

ბათუმი 1:0 სამგურალი

1:0 კობახიძე (45+3)

მეგოლეები: შოთა ნონიკაშვილი (იბერია), ბიორნ იონსენი (ნორვეგია, ტორპედო), ტაირელ ვოუტერი (ნიდერლანდები, დილა) – 3, მამუკა კობახიძე (ბათუმი), გიორგი კოხრეიძე (იბერია), ლაშა კოხრეიძე (კოლხეთი), ომრან ჰაიდარი (ავღანეთი, სამტრედია) – 2