მსოფლიოს მიმდინარე ჩემპიონატზე რიტუალად დამკვიდრდა, ყოველი თამაშის შემდეგ ლეო მესი არგენტინულ „ოლეს” აძლევს ინტერვიუს. ასე იყო საუდის არაბეთთან წაგებული პირველი შეხვედრის შემდეგ და ასე მოხდა მას მოყოლებული ხუთი მოგებული მატჩის მერეც. ხორვატიასთან თამაშის შემდეგ მსოფლიოს შვიდგზის საუკეთესო ფეხბურთელი ბედნიერი იყო რადგან არგენტინის ნაკრები ისტორიაში მეექვსედ გავიდა მუნიალის ფინალში — მის კარიერაში მეორედ.
ლეო 35 წლისაა. შემდეგ მსოფლიო ჩემპიონატზე 39-ის იქნება. ამიტომაც არ იყო გასაკვირი, რაც სტადიონის მიქს-ზონაში „ოლეს” ჟურნალისტს უთხრა — ფინალის შემდეგ ნაკრებში თამაშს შეიძლება თავი დვანებოო, თუმცა იქვე დასძინა, რომ მისი მხრიდან არ არის გამორიცხული ბონუსიც. „ოლე” იმედიანად წერს, რომ 2026 წლამდე შორია, მაგრამ მანამდე „ალბისელესტეს” უწევს შესარჩევი ტურნირები და კოპა ამერიკა…
მაშ ასე, მესი ნაკრებიდან შეიძლება წავიდეს, მაგრამ როგორც „ოლე” წერს მეტი რა უნდა მოსთხოვო კაპიტანს, რომლისთვისაც მიმდინარე მუნდიალი მეხუთეა; რომელმაც „ალბისელესტეს” ბომბარდირის რანგში გაბრიელ ბატისტუტას რეკორდი მოხსნა; რომელიც მუნდიალებზე ჩატარებული შეხვედრების რაოდენობით ლოთარ მათეუსს დაეწია და კვირას, ფინალში გადაასწრებს.
— როგორია კვლავ ფინალში ყოფნა?
— მიხარია, რომ კვლავ ფინალში ვარ. ერთხელაც ვითამაშებ და მსოფლიოს ჩემპიონატებზე ჩემს თავგადასავალს წერტილს დავუსვამ. ყველაფერი, რაც ამ მუნდიალზე გადამხდა, ძალიან ამაღელვებელია. ამაღელვებელია იმის ყურება, თუ რა ბედნიერია ხალხი არგენტინაში.
— კვირას მსოფლიოს ჩემპიონატებზე უკანასკნელად ითამაშებთ?
— დიახ. დაბეჯითებით დიახ. შემდეგ მუნდიალამდე ბევრი წელიწადია და მე მასში მონაწილეობას ვეღარ მივიღებ. წერტილის აქ დასმა საუკეთესო გამოსავალია.
— არგენტინის ნაკრებში გატანილი გოლების რაოდენობით თქვენ ბატის გადაასწარით, მსოფლიოს ჩემპიონატებზე ჩატარებული შეხვედრებით კი მათეუსს გაუტოლდით.
— ბევრჯერ მითქვამს, რომ ჩვენ სულ სხვა რამ გვინდა. ყველაფერი ძალიან კარგია, მაგრამ უმთავრესი გუნდური წარმატება გახლავთ. ის ყველაზე მშვენიერია. ბევრი ვიბრძოლეთ და ახლა მიზნამდე ერთი ნაბიჯიღა გვაშორებს. ყველა ღონეს ვიხმართ, საწადელი რომ ავისრულოთ — ამჯერად ჩემპიონები გავხდეთ.
