„კუნთის დაღლილობის” გამო ოსიმენმა ორშაბათის ვარჯიში გამოტოვა და დოქტორ კანონიკოსა და მის ბრიგადას საქმე მოუმატა. ჯერჯერობით ექიმი იმის გარანტიას, რომ თავდამსხმელი ითამაშებს, ვერ იძლევა.
ოსიმენმა შაბათს, „სტადიო ოლიმპიკოზე”, „ლაციოსთან” 2:1 მოგებულ შეხვედრაში 90 წუთი დაჰყო მოედანზე, მაგრამ, როგორც ჩანს, მასზე ზედიზედ ოთხჯერ სასტარტო შემადგენლობაში ყოფნამ მძიმედ იმოქმედა. ამას დაამატეთ ნიგერიელის თამაშის სტილი და შეხვედრათა სიხშირე.
ოსიმენი ის კაცია, რომელსაც თავი არასდროს დაუზოგავს და არც ამ შემთხვევაში მოიქცევა სხვანაირად, მაგრამ „ნაპოლიში” მის ჯანმრთელობას რისკის ქვეშ არავინ დააყენებს. გასაგებია, რომ ოსიმენს ძალიან უნდა „ლივერპულთან” თამაში. ყველაფერს რომ თავი დავანებოთ ეს მისი დებიუტი იქნება ჩემპიონთა ლიგაში, მაგრამ სპალეტი არ დაუშვებს, რომ ეიფორიის გამო ცენტრფორვარდი დიდი ხნით დაკარგოს. ამიტომ, არ არის გამორიცხული, რომ მოედანზე ვიხილოთ 22 წლის ჯაკომო რასპადორი, რომელიც „ცრუ 9 ნომრის” ფუნქციას შეასრულებს.
თუმცა გაზეთი იმასაც წერს, რომ ამ ტიპის ტრავმების დროს ადამიანის ორგანიზმი ხშირად გონებას ემორჩილება და მოქმედებს ფსიქოლოგიური ფაქტორი, რის შედეგადაც თამაშს მოწყურებული ფეხბურთელი შესაძლოა სწრაფად გამოჯანმრთელდეს.
