ეს უნდა ნახოთ! 33 წლის ავსტრალიელ მეკარეს ენდრიუ რედმეინს ნაკრებში სულ სამი თამაში აქვს ჩატარებული, მაგრამ მან „სოკერუ” (ანუ ავსტრალიის ნაკრები) მსოფლიოს ჩემპიონატზე გაიყვანა.

კლუბ „სიდნეის” კარის მცველმა, რომელიც ეროვნულ გუნდში სათადარიგოთა შორის სათადარიგოა, პერუსთან ფლეი-ოფის ბოლოს, პენალტების სერიაში გადამწყვეტი დარტყმა მოიგერია და ყატარი 2022-ის საგზური მოინადირა. ის მოედანზე დამატებითი დროის ბოლოს, 120-ე წუთზე შევიდა. მან მთავარი მეკარე „რეალ სოსიედადის” მეტიუ  რაიანი შეცვალა. როგორც გაირკვა მწვრთნელის გრემ არნოლდის გათვლა სწორი ყოფილა. პენალტების მოსაგერიებლად შესულმა გოლკიპერმა გაამართლა, მაგრამ ნეიტრალური მაყურებლისთვის აქ მთავარი ის არის, თუ როგორ დახტოდა რედმეინი პერუელთა დარტყმების წინ კარის ხაზზე. ასეთი ხერხით ის მეტოქეების დაბნევას ცდილობდა და როგორც გამოჩნდა, მიაღწია კიდეც მიზანს.

შეხვედრა და დამატებითი დრო 0:0 დასრულდა.