ჟონჯო შელვი

„ნიუკასლი“ რომ გამდიდრდა ყველამ იცის. მალე „კაჭკაჭები“ ალბათ კილიან მბაპესა და მსგავს გალაქტიკოებზე დაიწყებენ ნადირობას, მანამდე კი ჯონჯო შელვი და მისი ჯანი. „კაჭკაჭების“ ნახევარმცველმა, რომელიც ადრე „ლივერპულშიც“ თამაშობდა, „ენფილდ როუდზე“ ჩინებული დარტყმით გახსნა ანგარიში, მაგრამ მერე… შეცდა და მო სალაჰს შეხვედრის გადამწყვეტი გოლის გატანის საშუალება მისცა.

დღეს, როდესაც კოვიდპანდემიის გამო პრემიერლიგა ლამისაა გაჩერდეს, შეხვედრის პირველმა ტაიმმა გააჩინა იმედი, თითქოს დაბრუნდა დრო, როდესაც ეს გუნდები შვიდგოლიან თრილერებს აწყობდნენ.

ასეთი დრო ჯორდულ-არაბული პროექტის წყალობით შეიძლება მართლა დაბრუნდეს, მაგრამ მანამდე ბოლოსწინა ადგილზე მყოფი ნიუკასლი სულ მცირე პრემიერლიგიდან არ უნდა გავარდეს.

ამ შეხვედრაში მერსისაიდელთა გერმანელ თავკაცს იურგენ კლოპს კორონავირუსის გამო აკლდნენ ვირჯილ ვან დაიკი, ფაბინიო და კერტის ჯონსი, თუმცა იმის ძალა ედი ჰაუს გუნდი რომ დაემარცხებინა, ჰქონდა. ლივერპულელთაგან გოლები გაიტანეს დიოგო ჯოტამ, სალაჰმა და ტრენტ ალექსანდერ-არნოლდმა. ამ სამიდან პირველი გოლი ცოტა საკამათო იყო (საჯარიმოში დაშავებული ნიუკასლელი იწვა, მსაჯმა კი თამაში არ გააჩერა), მესამე კი ულამაზესი.

17 ტურის შემდეგ წითლები ლიდერ „მანჩესტერ სიტის“ ერთი ქულით ჩამორჩებიან და რაკი „ჩელსი“ ამ ბოლო დროს იშკილებიდან ჩამოვარდა, პრემიერლიგის ჩემპიონის ბედი შეიძლება კლოპისა და პეპ გვარდიოლას გუნდების დაპირისპირებამ გადაწყვიტოს. თუმცა, სეზონის დამთავრებამდე ჯერ მაინც ადრეა.