ევროპულ რაგბში სათასო ტურნირების დრო მოვიდა და ორივე მათგანში რამდენიმე ქართველმა მიიღო მონაწილეობა.
ჩემპიონთა თასის 2021-22 წლების სეზონი ინგლისური „ნორთჰემპტონისა“ და ფრანგული „რასინგ-92“-ის მატჩით გაიხსნა, რომელიც პარიზელთა დიდი გამარჯვებით დასრულდა – 45:14. „რასინგის“ სასტარტო შემადგენლობაში ბორჯღალოსანი ბურჯი გურამ გოგიჩაშვილი იყო, რომელმაც 55-ე წუთამდე დამაჯერებლად ითამაშა.
აი, ტოპ 14-ის ლიდერმა „ბორდომ“ კი მომძლავრებულ „ლესტერ თაიგერსთან“ შინ მოულოდნელად 13:16 წააგო. ბორჯღალოსანი ლექსო ყაულაშვილი თამაშში 48-ე წუთზე ჩაერთო.
ინგლისის ერთ-ერთმა უძლიერესმა გუნდმა, „ექსეტერ ჩიფსმა“ კი „მონპელიეს“ უმასპინძლა და უმოწყალოდ გაანადგურა – 42:6. ფრანგული გუნდის სასტარტო შემადგენლობაში გამოჯანმრთელებული გელა აფრასიძე იყო, ვინც 61-ე წუთზე შეცვალეს.
ეს იყო და ეს, ჩემპიონთა თასის პირველ ტურში მხოლოდ სამმა ჩვენებურმა მიიღო მონაწილეობა. ჩელენჯ კაპის კი პირველივე მატჩში ამდენივე ბორჯღალოსანმა ითამაშა.
ფრანგულმა „ლიონმა“ ინგლისურ „გლოსტერს“ უმასპინძლა და 19:13 დაამარცხა. სამივე ჩვენებურმა შეუცვლელად, 80-ვე წუთი გაატარა მოედანზე: ლიონელთა შემადგენლობაში ბექა საღინაძემ და დავით ნინიაშვილმა, ხოლო გლოსტერელთა შორის – გიორგი კვესელაძემ. სამივემ ჩინებულად იბურთავა და თავთავისი მწვრთნელი კმაყოფილი დატოვა.
„პერპინიანმა“ უელსურ „დრაგონსს“ 22:16 მოუგო და ფრანგული კატალონიის გუნდში საერთაშორისო დებიუტი გიორგი ჯინჭარაძეს ჰქონდა. ახალგაზრდა ქართველმა ბურჯმა ამ რამდენიმე დღის წინ „პერპინიანთან“ კონტრაქტი 2025 წლამდე გაახანგრძლივა და ეს ამბავი მშვენივრად ჩატარებული მეორე ტაიმით აღნიშნა.
ბოლოსთვის კი ყველაზე კარგი ამბავი მოვიტოვეთ – ფრანგულმა „ბიარიცმა“ იტალიურ „ძებრეს“ გასვლაზე 26:13 სძლია და ბასკთა ამ წარმატებაში ქართული წვლილიცაა – საქართველოს ნაკრების კანდიდატმა უჩა ჭეიშვილმა 47-ე წუთზე რაქიდან ატაცებული ბურთი გულში ჩაიკრა და პარტნიორის დახმარებით იტალიელთა დაცვა გაარღვია. ეს იყო „ბიარიცის“ რიგით მესამე ლელო და სწორედ ამ მომენტმა საბოლოოდ გატეხა „ძებრე“.
ჭეიშვილი 67 წუთზე შეცვალეს, მანამდე კი, 61-ეზე თამაშში სხვა ქართველი ბურჯი ჩაერთო – გამოცდილი ვახტანგ ახობაძე.