პიერ დე კუბერტენი საფლავში ტრიალებს

ვის და რატომ დასჭირდა ოლიმპიადის გახსნამდე სამი დღით ადრე მისი ერთ-ერთი სიმბოლოს შეცვლა? რა სარგებელი?

იქნებ მუხლზე დამდგარი თეთრი ან შავკანიანი კაციც (ეგ უკვე სულ ერთია) ოლიმპიადის სიმბოლოდ გვექცია?

მოკლედ: დღეს ტოკიოში სერთაშორისო ოლიმპიური კომიტეტის სხდომა გაიმართა. სხვა საკითხებთან ერთად იმაზეც იმსჯელეს, რომ (თურმე, ნუ იტყვით) ოლიმპიური დევიზი დაგვიძველდა.

დიდი ჭმუნვების შედეგად ახალი ვერსიაც იშვა: “უფრო სწრაფად, უფრო მაღლა, უფრო ძლიერად – ერთად!”

ბრავო! ამას მიგნება არ უნდოდა? საკმარისი იყო ერთი სიტყვა „ერთად“ დამატებოდა და დევიზმა სულ სხვა ელფერი შეიძინა.

ახლა კი სერიოზულად: ბოლო ხანი ეს კანტორაც მაფიოზურ კლანს დაემსგავსა. ეს „ბოლო ხანი“ ჩემთვის სოკ-იდან ხუან ანტონიო სამარანჩის წასვლის შემდეგ დაიწყო. ვერ ვხედავ, რომ ვინმე უშუალოდ სპორტზე ფიქრობდეს და სოკ-ი სრულად ტელეტრანსლაციადამოკიდებული გახდა. ოღონდ ფული მიეცი და სრულად ამოიღებენ პროგრამიდან ძველბერძნულ ოლიმპიურ სახეობებს ეს ახალი ფორმაციის კუბერტენები.

იმედი მაქვს, იაპონელები მაინც დარჩებიან საკუთარი თავის ერთგული და გახსნა-დახურვის ცერემონიას დაუფარავი პოლიტიკური კონიუნქტურის გარეშე, ტრადიციულ მოტივებზე შემოგვთავაზებენ.

ავტორის პროფილი

გიორგი ნოზაძე: მას შეეძლო, დილის 11 საათისთვის გაზეთის ორი გვერდი მზად ჰქონოდა და გადაერეკა თანამშრომლებისთვის - ნუ შეწუხდებით, სამსახურში ნუღარ მოხვალთ, საქმე გაკეთებულია. ფეისბუკის ნამდვილი ფეისი. ის გახლავთ სოციალურ ქსელში "მოამბეც" და "ვრემიაც".