24 წლის თავდამსხმელი ბორხა მაიორალი ესპანეთის ოლიმპიურ ნაკრებს ტოკიოში ზაფხულის თამაშებზე სჭირდება, მაგრამ „რომა”, უფრო ზუსტად კი მისი ახალი მწვრთნელი ჟოზე მოურინიუ არ უშვებს.

მართალია, ოლიმპიადაზე ფეხბურთის შეჯიბრება 21 ივლისს იწყება და 7 აგვისტოს მთავრდება, სერია A კი 22 აგვისტომდე ისვენებს, მაგრამ პორტუგალიელ მწვრთნელს „რომას” ფეხბურთელები სეზონისწინა შეკრებაზე სჭირდება და ერთის დათმობასაც არ აპირებს.

მაიორალი, რომელიც ადრე „რეალში” თამაშობდა, საიდანაც იჯარით იყო გაშვებული „ვოლფსბურგსა” და „ლევანტეში”, 2020 წლიდან „ჯალოროსის” ფორვარდია და გასულ სეზონში 41 შეხვედრაში გატანილი 17 გოლით კლუბის საუკეთესო ბომბარდირი გახდა.

ბორხა მაიორალს ესპანეთის დიდ ნაკრებში ნათამაშები არ აქვს, 21-წლამდელთა გუნდში კი 31 შეხვედრაში 16 გოლი გაუტანია.