უნგრეთის დედაქალაქ ბუდაპეშტში მიმდინარე ძიუდოს მსოფლიო ჩემპიონატზე საქართველოს დელეგაციას მედლის მოპოვების შანსი ჰქონდა, მაგრამ მსაჯებთან და წესებთან დამარცხდა.
90 კილოგრამამდე მოჭიდავე ბექა ღვინიშვილი პირველივე ბრძოლაში შვეიცარიელ სირილ გროსკლაუსს ხვდებოდა. ღვინიშვილი ვაზარით დაწინაურდა, შემდეგ შვეიცარიელი მეორედ დასცა ტატამზე. მსაჯმა ქართველის მოგება დააფიქსირა, მაგრამ მაგიდის მსაჯებმა ეპიზოდი განიხილეს, ჩვენებურს სახიფათო შეტევა ჰანსოკუმაკე (ფეხის არასწორი ჩახვევა) დაუფიქსირეს და წაგება ჩაუთვალეს.
70 კილოგრამამდე წონით კატეგორიაში მოჭიდავე მარიამ ჭანტურიამ პირველ წრეში გაბონელი კარენე აგონო ვორა დაამარცხა, მაგრამ მეორე წრეში გერმანელ მირიამ ბუტკერეიკთან დამარცხდა და ტურნირს გამოეთიშა.
11 ივნისს ტატამზე 100 კილოგრამამდე წონით კატეგორიაში მოჭიდავეები – ვარლამ ლიპარტელიანი და ილია სულამანიძე გავლენ.
