ახალგაზრდა ქართველმა მორაგბემ ლუკა ნიორაძემ საფრანგეთის პრო დ2-ის 25-ე ტურში თავი გამოიჩინა.
ლიგის ყველაზე ქართულმა კლუბმა – „ორიაკმა“ გათამაშების ლიდერ „პერპინიანს“ უმასპინძლა და ფრეს (27:27) მიაღწია, რაც უთუოდ წარმატებად უნდა ჩაეთვალოს. ჰოდა, მე-11 წუთზე მასპინძელთა 22 წლის ქართველმა კვაჭმა თანაგუნდელი ფორვარდების და მათ შორის გიორგი ქართველიშვილის ძალისმიერი შეტევა ლელოთი დააგვირგვინა.
ეს იყო ლუკას მესამე ლელო საფრანგეთის მიმდინარე ჩემპიონატში ჩატარებულ მე-15 მატჩში. გარდა ამისა, ის რამდენჯერმე ტურის სიმბოლურშიც მოხვდა.
ნიორაძე საქართველოს U20 ნაკრების წევრი იყო და ასაკობრივ მსოფლიო ჩემპიონატშიც მიუღია მონაწილეობა. ხომ არ დადგა დრო, ბორჯღალოსნების ხელმძღვანელობამ ამ ნიჭიერ მოთამაშეს ყურადღება მიაქციოს? მით უმეტეს, რომ კვაჭის პოზიციაზე ნაკრებში უკლუბო ვეტერანები ასპარეზობენ…
