ესპანეთის თასის მფლობელი და როგორც საკუთარი ქვეყნის, ასევე ევროპის ყველაზე პრესტიჟული საკალათბურთო ტურნირის, ევროლიგის ფავორიტი „ბარსელონა“, კიდევ უფრო გაძლიერდა.
„ბარსას“ პრეს-სამსახურმა დაადასტურა, რომ გუნდმა კონტრაქტი გააფორმა ვეტერან ესპანელ კალათბურთელ პაუ გაზოლთან. პაუ „ბარსაში“ 16 ნომრით ითამაშებს.
40 წლის გაზოლი NBA-ს ორგზის ჩემპიონი, სამგზის ოლიმპიური პრიზიორი, მსოფლიოსა და ევროპის ჩემპიონია.
გაზოლმა პროფესიული კარიერა სწორედ „ბარსელონაში“ დაიწყო, ხოლო 2001 წელს თავი NBA-ს დრაფტზე დააყენა, სადაც მესამე ნომრად აირჩიეს. შედეგად, კარიერის დიდი ნაწილი ოკეანის გაღმა გაატარა. უთამაშია „მემფისში“, „ლოს-ანჯელეს ლეიკერსში“, „ჩიკაგოში“, „სან ანტონიოსა“ და “მილუოკიში“.
გაზოლი NBA-ს ისტორიაში ერთ-ერთი საუკეთესო ევროპელია.
