გეხსომებათ, ხელშეკრულებაში იყო პუნქტი, რის შესაბამისადაც კოუტინიუ თუ ჩემპიონთა ლიგას მოიგებდა, „ბარსელონა“ მერსისაიდელებს 5 მილიონ ევროს გადაუხდიდა. კოუტინიუმ მოიგო ჩემპიონთა ლიგა, მაგრამ მიუნხენის „ბაიერნის“ მაისურით, სადაც „ბარსამ“ გაანათხოვრა. ჰოდა, კატალონიელებიც იძულებულნი გახდნენ „ლივერპულისთვის“ თანხა გადაეხადათ.
მალე „ბარსელონას“ მორიგი მილიონების გაღება მოუწევს. საქმე ის არის, რომ თუ კოუტინიუ „ბარსას“ მაისურით 100 მატჩს ჩაატარებს, „ლივერპული“ დამატებით 20 მილიონსაც მიიღებს. ეს კონტრაქტში წერია.
ამჟამად, ბრაზილიელის ანგარიშზე 88 მატჩია, რაც ნიშნავს, რომ, რეგულარულად თამაშის შემთხვევაში, 100-მატჩიან ნიშნულს, ამ ზამთარშივე მიაღწევს.
ჰოდა, ახლა „ბარსა“ 28 წლის ფეხბურთელის გაყიდვაზე დაფიქრდა, რადგან ბრაზილიელში გადასახდელი ფინანსური ამოცანა დღემდე ვერ ამოხსნა…
