„ბარსელონა“ – „იუვენტუსის“ სააჩემპიონთალიგო დაპირისპირებამ კიდევ ერთხელ აქცია საკამათოდ ვიდეორეფერის ობიექტურობის და საერთოდ საჭიროების საკითხიც კი…ნამატჩევს „ბარსას“ თავკაცი რონალდ კუმანი აღშფოთებას ვერ მალავდა, რონალდუზე არდასადები პენალტი დაიდო და მესიზე კი უეჭველი დარღვევა გაატარესო.
მოგეხსენებათ, გოლი სენსორებით ფიქსირდება, თამაშგარეს ლაზერული სისტემა არკვევს და რაღა დარჩა ვიდეორეფერის, მხოლოდ პენალტის დანიშვნა-არდანიშვნა?
რაში მდგომარეობს ვიდეორეფერის უპირატესობა?
სტუდიაში მჯდომს მსაჯებს შენელებულ რეჟიმში და რამდენიმე რაკურსით შეუძლიათ სადავო ეპიზოდის ნახვა. თუმცა, ეს სულაც არ ნიშნავს, რომ რაკურსი უფრო ოპტიმალური იქნება, ვიდრე ის, რომლიდანაც ეპიზოდს მინდვრის არბიტრი ადევნებდა თვალს.ახლა უარყოფითი მხარეები: ფეხბურთელებზე უკეთ ვინ იცის, რა ძნელია სათამაშო ტონუსის შენარჩუნება რამდენიმეწუთიანი პაუზის შემდეგ. განსაკუთრებით, როცა ასეთი პაუზა მატჩის მსვლელობისას არაერთია.
ზარალობს ფეხბურთელი, ზარალობს ქომაგი და ზარალობს ფეხბურთი.
გახშირებული პრეტენზიებისა და სკანდალების ფონზე უეფას პრეზიდენტი ალექსანდერ ჩეფერინიც კი იძულებული გახდა ეღიარებინა, რომ სისტემა დახვეწას საჭიროებს. დახარჯულია ასობით მილიონი, მთავარი მსაჯი მოედანზე დაუღალავად დარბის, თავი მართლაც მთავარი ჰგონია და ყველაზე საბედისწერო მომენტებს კი თბილ სტუდიაში მჯდომი მისი კოლეგა წყვეტს.
საერთოდ ვის სჭირდება ამგვარი დაუხვეწავი სისტემა, რომელიც მხოლოდ სკანდალებს შობს?
