ჯერ გასინჯეთ, მერე განსაჯეთ!

ტურინის „იუვენტუსი“ კვლავაც დაინტერესებულია ალვარო მორატას დამატებით. „ბიანკონერის“ ხელმძღვანელობას სურს, 27 წლის ფორვარდი 10 მილიონ ევროდ იჯარით აიყვანოს და 45 მილიონად გამოსყიდვის ექსკლუზიური უფლებაც დაიტოვოს. „ატლეტიკო“ ისეც მზად იყო წინადადების განსახილველად. მას შემდეგ, რაც „ბარსელონა“ ლუის სუარესის უფასოდ გაშვებას დათანხმდა, „ატლეტიკო“ სუარესს აიყვანს და მორატას შეელევა. მორატას იჯარის ვადაც სიმბოლური ამბავია. ტურინში მას მშვენივრად იცნობენ – 2014/2016 წლებში ხომ იქ ბურთაობდა, მაგრამ მაინც გამოცდას უწყობენ. „იუვენტუსს“ ედინ ჯეკოს დამატებაც უნდა. „რომა“ ბოსნიელს იმ შემთხვევაში შეელევა, თუ „ნაპოლიდან“ მილიკის ტრანსფერს გაჩარხავს.