ედინსონ კავანის ბედი ჯერ კიდევ ჰაერშია გამოკიდებული. 33 წლის ურუგვაელი „პარი სენ ჟერმენიდან” თითქოს „ბენფიკაში” უნდა გადასულიყო, მაგრამ იტალიური „გაძეტა დელო სპორტის” ცნობით ისეთ ხელფასს ითხოვს, რომ ლისაბონის კლუბმა ხელები ასწია.

„ბენფიკას” შემდეგ სხვა მსურველებიც გააქტიურდნენ, რომელთა შორის, კატალონიური „სპორტის” ინფორმაციით, „რეალიც” არის.

გამოცემა ამბობს, რომ მადრიდელებს ერთი ან ორი ახალი თავდამსხმელი სჭირდებათ. მიზეზი: სერბმა ლუკა იოვიჩმა და ესპანელ-დომენიკელმა მარიანო დიასმა ვერ გაამართლეს. კავანი კი, ასაკის მიუხედავად, გოლების მანქანაა.

ურუგვაელის შეძენა კარგა ხანია უნდა მადრიდის „ატლეტიკოსაც”, მაგრამ დიდ სახელფასო მოთხოვნებს ვერც „მატრასები” უხერხებენ რამეს.