მიუნხენის „ბაიერნის“ ბრაზილიელმა ნახევარმცველმა ფილიპე კოუტინიუმ მარჯვენა ფეხის ტერფზე ოპერაცია 24 აპრილს გაიკეთა. წინასწარი პროგნოზით, ფეხბურთელი ბუნდესლიგის განახლებას სრულ მზადყოფნაში უნდა შეხვედროდა, მაგრამ ტრავმა გართულდა. ექიმების თქმით, სარეაბილიტაციო კურსი ექვსიდან რვა კვირამდე გასტანს, რაც იმას ნიშნავს, რომ მიმდინარე სეზონში კოუტინიუ „რეკორდმაისტერს“ ვეღარ დაეხმარება.შეგახსენებთ, რომ კოუტინიუს კონტრაქტი „ბარსელონას“ ეკუთვნის, გერმანელებთან საიჯარო ხელშეკრულებას კი სეზონის ბოლოს გასდის ვადა. ბრაზილიელს, სავარაუდოდ, გაყიდიან, რისი უპირველესი მიზეზიც მისი ასტრონომიული ხელფასია. მსურველთა შორის ფავორიტი ინგლისური „ნიუკასლია“, კატალონიელებს კი მის სანაცვლოდ ერთბაშად 80 მილიონი ევროს მიღება სურთ. თავის დროზე კოუტინიუ „ბარსამ“ „ლივერპულიდან“ 120 მილიონად იყიდა.
