„კამპ ნოუზე” „ბარსელონასა” და „რეალის” შეხვედრა 0:0 დასრულდა, მაგრამ მადრიდელებს დარჩათ შთაბეჭდილება, რომ მათ სასარგებლოდ ორი პენალტი არ დანიშნეს.
ორივე ეპიზოდში საქმე სტუმრების ფრანგი ცენტრალური მცველის რაფაელ ვარანის წინააღმდეგ წესების დარღვევას ეხებოდა. ერთი ეპიზოდი უფრო აშკარა იყო — ლაპარაკია ივან რაკიტიჩის მიერ ვარანის მაისურით დაჭერასა და დაგდებაზე.
ყოფილმა ესპანელმა მსაჯმა, ახლა კი მას-მედიის ექსპერტმა ანდუხარ ოლივერმა ეპიზოდი ასე შეაფასა:
„რასაკვირველია, რაკიტიჩმა ვარანი დაქაჩა. აქ ყველაფერი აშკარა იყო. ვიდეოჩანაწერში აშკარად ჩანდა, რომ პენალტი უნდა დანიშნულიყო. საინტერესოა, სად იყო ამ დროს ვიდეორეფერი?”
რაც შეეხება მეორე ეპიზოდს, ეს უკვე ვარანისა და მისი თანამემამულის კლემენტ ლენგლეს ორთაბრძოლას ეხება. ამ ეპიზოდში ვარანს ფეხზე ლენგლეს ქაცვების კვალიც კი დარჩა, თუმცა ოლივერმა ასე თქვა:
„ბარსელონელი პირდაპირ ქაცვებით წავიდა, მაგრამ მე არ დამრჩენია შთაბეჭდილება, რომ მსაჯს ამ ეპიზოდში პენალტი უნდა დაენიშნა”.
