ნებისმიერი ქვეყნის ნაკრებს გარკვეულ სტერეოტიპს მოვარგებთ ხოლმე და მერე ჟამთასვლის და თაობათა ცვლის მიუხედავად, იმავე სტერეოტიპით ვზომავთ. ამადაც გაგვეხარდა დანიამდე სამი დღით ადრე სამხრეთ კორეასთან სპარინგი – მობილურ და მებრძოლ კორეელებს სულ კაპიკ-კაპიკ უნდა ჩამოეხურდავებინათ ჩვენი პრობლემები. არ გამოვიდა. აზიელებმა ვერ გაგვიმართლეს და თუ მობილურობა-ბრძოლისუნარიანობით გავზომავთ, ეს სამხრეთ კორეა უფრო ყაზახეთია, ვიდრე დანია.

პარველ ტაიმში არაფერი გვქონდა საწუწუნო. ბურთი უფრო იმათი იყო და შედარებით ხარისხიანი ფეხბურთი – ჩვენი. შეტევაზე აქცენტი და მაღალი პრესინგიც არ იყო ურიგო, თუმცა სიმბოლური 4-2-4-ც კი მეტისმეტად თამამი გვეჩვენა. თუკი ეს დანიასთან მატჩის რეპეტიცია იყო, 8-ში ორკაციან ნახევარდაცვას წელში გადაგვიტეხენ და მოედნის ცენტრის გარეშე დაგვტოვებენ.

ფეხბურთელების ინდივიდუალური ფორმა თითქოს ნორმალურია. მხოლოდ მიწურულს დაგვეტყო დაღლა, როცა კორეამ მეორე სიჩქარე ჩართო. ერთი შენიშვნაც: შემტევთა სიჭარბის გამო, თავის გამოჩენა ყველას უნდოდა და საგოლე პასს საეჭვო პოზიციიდან დარტყმა ამჯობინეს. მისალოცი ამბავია და ნამდვილად არ დაკარგულა მოედანზე ზურიკო დავითაშვილი.

ანგარიში? როცა ოთხიდან სამი გოლი აშკარა თამაშგარედან გავა, რა დროს ანგარიშია, მაგრამ მარცხს ფრე სჯობია. თანაც, ბოლოს როდის იყო, თამაში ბოლო წუთზე რომ გადავარჩინეთ?

სტამბული. “ფათიჰ თერიმი”
საქართველო – სამხრეთ კორეა 2:2
1:0 ანანიძე (40), 1:1 ჰვანგი (48), ჰვანგი (85), ქვილითაია (90)
საქართველო: მაკარიძე, კაკაბაძე, კაშია, ტაბიძე, ხარაბაძე, აბურჯანია (გვილია 61), კიტეიშვილი (დაუშვილი 71), დავითაშვილი (ლობჟანიძე 73), ანანიძე (პაპუნაშვილი 60), ოქრიაშვილი (ქვილითაია 61), ყაზაიშვილი (კანკავა 80)
სამხრეთ კორეა: სუნგ-იუნი, ჯინ-სუ, მინ-ჯაე, კიუნგ-ვონი, ჰი-ჩანი, კანგ-ინი (ბო-კიუინგი 72), სეუნ-ჰო (იუნგ-გვონი 46), ჩანგ-ჰონი, ჯი-სუ (ვო-იუნგი 46), ჯეონგ-ჰეიოპი (უი-ჯო 46), სონი (სანგჰო 62)
წილი
წინა სტატიაკაფუს შვილი დაეღუპა
შემდეგი სტატიაშეშლილი სამყარო
კობა ინასარიძე
კობა ინასარიძე–ანი ინასარიძის და ექსკლუზიური მასალების მამა. ხშირად შემჩნეულია ქართულ ფეხბურთში არსებული განუკითხაობისა და არაპროფესიონალიზმის წინააღმდეგ ბრძოლაში. დელიკატესებიდან უყვარს "სარბიელი", ლუდი და გერმანიის ნაკრები.