წითელი ფინალში – სარბიელი

გაბრიელ ჟესუსი მძვინვარებდა და ტიროდა — ის „კოპა ამერიკას” ფინალში გააგდეს.

ბრაზილიის ნაკრებისა და „მანჩესტერ სიტის” თავდამსხმელმა ამავე შეხვედრაში საგოლე პასი გადააწოდა და გოლიც გაიტანა. თამაშის მე-15 წუთზე მან „გრემიოს” ფორვარდ ევერტონს გაუწია ასისტენტობა, ხოლო პირველი ტაიმის მიწურულს, უფრო სწორად, მსაჯის წამატებულ დროში, პერუელთა მიერ ანგარიშის გათანაბრებიდან ოთხი წუთის შემდეგ, ჩემპიონატის მასპინძლები კვლავ წინ გაიყვანა — 2:1.

მაგრამ, როდესაც შეხვედრის დასრულებამდე 20 წუთი რჩებოდა, ჟესუსი მოედნიდან გააგდეს — მეორე ყვითელი ბარათი გაუწითლდა. არადა, ეპიზოდი, რომლის გამოც ჩილელმა მსაჯმა რობერტო ტობარმა ჯიბეში ხელი ჩაიყო, თითქოს არ იყო ბრუტალური. ეს უფრო მაღალ ბურთზე ახტომისას ორი ფეხბურთელის შეჯახებას ჰგავდა, რომლის დროსაც შესაძლოა ერთმა თამაშის წესი დაარღვია, მაგრამ განა წესის ყველა დარღვევა რომელიმე ფერის ბარათით უნდა დისაჯოს?

გაძევებამ ჟესუსზე ძლიერ იმოქმედა: ჯერ იყო და ვერა და ვერ დაამთავრა მსაჯთან დავა, შემდეგ წყლის ბოთლებს ურტყა წიხლი, შემდეგ VAR-ის სტენდს ეძგერა და კინაღამ გადაატრიალა…

ერთი ხნის შემდეგ კი, გულშემატკივარმა, რომელიც შეხვედრის ტრანსლაციას ტელევიზიით უყურებდა, ნახა, როგორ იჯდა გაბრიელ ჟესუსი სადღაც, გვირაბს შიგნით, კიბის თავზე, ტიროდა და მას ბრაზილიის ნაკრების წარმომადგენელი აწყნარებდა.

ბრაზილიამ გაიმარჯვა 3:1.