დიდი შანსი იყო, ბუნდესლიგის ზედიზედ მეშვიდედ მოგება „ბაიერნს“ უკვე შაბათს გაეფორმებინა, მაგრამ გასვლით შეხვედრაში „ლაიფციგს“ უგოლოდ გაეყარა.ეს ის „ლაიფციგია“, უკვე 31-ე ტურის შემდეგ რომ დაიბევა ჩემპიონთა ლიგის საგზური, მაგრამ რეკორდმაისტერს მაინც ბოლომდე ეომა.
თავის მხრივ, „დიუსელდორფთან“ რთული მატჩი მოიგო (3:2) „დორტმუნდმა“ და ახლა კონკურენტს ორი ქულით ჩამორჩება. ბურთების ბალანსსა და ურთიერშეხვედრებში მიუნხენელთა უპირატესობა აშკარაა და საკმარისია, ბოლო ტურში შინ „აინტრახტთან“ არ წააგოს და ჩემპიონია. მაინც ნუ ვიჩქარებთ, რადგან ფრანკფურტელები ლიგის მეოთხე საგზურისთვის იბრძვიან და იოლად არაფერს დათმობენ. ლიგის საგზურისთვის მებრძოლ „გლადბახს“ დაეჯახება ბოლო ტურში „ბორუსიაც“. თანაც ლუსიენ ფავრის შეგირდებს მხოლოდ საკუთარი გამარჯვება და პარალელურად მიუნხენელთა მარცხი გააჩემპიონებს. შექმნილ ვითარებაში ჩემპიონთა ლიგის საგზურისთვის ბრძოლაში ოდნავი უპირატესობა „ლევერკუზენის” მხარესაა, რომელიც ბოლო ტურში მე-10 ადგილზე გამაგრებულ და უპრეტენზიო „ჰერტას“ ესტუმრება.
სხვა დროს „ბაიერნი“ უკვე საჩემპიონო მილოცვების მიღებას დაიწყებდა, მაგრამ არა წლეულს – ჩემპიონთა ლიგის სიგიჟეებმა მსაჯის საფინალო სასტვენამდე ზეიმი აკრძალა.
ისე, საინტერესოა, რომ შარშან აინტრახტმა ბაიერნს გერმანიის თასი აართვა. იმ აინტრახტს კი ბაიერნის ამჟამინდელი და უკვე ათვალწუნებული მწვრთნელი ნიკო კოვაჩი თავკაცობდა.
