ახლა თუ უნდა, მთელმა ევროპამ ცუდ სტუმარ-მასპინძლობაში ჩაგვითვალოს.ბათუმელებს ევროპის ჩემპიონატის ორგანიზებასა და სტუმრების მიღება-განთავსებაში წუნს ვერავინ დასდებს. ერთი ეგ იყო, რომ ყველაზე მთავარი მედლები და ევროტრიუმფი სხვებისთვის ვერ გავიმეტეთ.
ლაშა ტალახაძე მხოლოდ უდიდესი სპორტსმენი არ არის – ჩვენთვის სიამაყე და სიმდიდრეა, სხვათათვის კი ამოუხსნელი ამოცანა. სადღაც ხომ უნდა გადიოდეს ადამიანის შესაძლებლობის ზღვარი? ლაშამ ყველა დანარჩენისთვის ეს ზღვარი უსასრულობამდე გადაწია და მეტოქედ საკუთარი თავიღა შერჩა.
ტალახაძემ ორივე მოძრაობა იქ დაიწყო, სადაც სხვებმა დაასრულეს. ორივე მოძრაობაში ორ-ორი ცდა იკმარა მსოფლიო რეკორდის დასამყარებლად და ფიცარნაგი ისე დატოვა, სუნთქვის აჩქარება ვერავინ შეატყო.
218 კილოგრამი ატაცში და 260 აკვრაში! მიდით და გაეჯიბრეთ!
ქებათაქება ირაკლი თურმანიძეს. მისი ორჭიდის ჯამში აწეული 447 საჩემპიონო შედეგია, მაგრამ ნაკრების კაპიტანს ოდნავ არ გაუმართლა, რომ ტალახაძის ეპოქაში მოუხდა ასპარეზობა.
მედლები სხვაც საკმაოდ მოინადირეს ჩვენმა ბიჭებმა: შოთა მიშველიძემ (61 კგ) და რეზი დავითაძემ (89) ატაცში ოქროები მოიგეს და დავითაძემ ამას აკვრასა და ორჭიდში ვერცხლებიც დაუმატა. ანტონ პლესნოიმ (96) საქართველოს ყულაბას ატაცში ვერცხლი და ორჭუდში ბრინჯაო შემატა, გოგა ჩხეიძემ (67) აკვრაში ვერცხლი და ორჭიდში ბრინჯაო, ირაკლი ჩხეიძემ (102) კი ატაცის ბრინჯაო.
მოკლედ, ბათუმში ჩვენმა ახალგაზრდულმა გუნდმა მედლებად იწვიმა.
ტრიუმფალური შედეგი გია ასანიძისა და კახი კახიაშვილის უდიდესი დამსახურებაა. ახლა მათივე ბიჭობის ამბავია, ჩვენი ნაკრები გაისად რამდენ მედალს მოიმკის ტოკიოს ოლიმპიადაზე.
