სოციალური ქსელი აჭრელებულია მავანი ინგლისელი ფანის, ენდრიუ სვიფტის ისტორიით, ვინაც დამლაგებლის ფორმაში გადაცმული შეიპარა ბაიერნი – ლივერპულის ჩემპიონთა ლიგის მატჩის არენაზე…
ჩვენ კი „ალიანც არენაზე“ შეღწევის უფრო თამამ და ერთი შეხედვით დაუჯერებელ ამბავს მოგიყვებით, რომლის მთავარი გმირიც ამსტერდამში მცხოვრები ჩვენებური ჯეელი გახლავთ.
ფაქტია, ენდრიუს და ქართველის საქციელები შექმნილი ვითარებით იყო გამოწვეული, ორივე მათგანი სასურველ მატჩზე მოხვედრის იმედად ეწვია მიუნხენს და ორივემ აღმოაჩინა რომ ბილეთების შოვნა შეუძლებელი იყო. თავად გახლდით შემსწრე, ქალაქში, მეტროში, „ალიანც არენის“ სიახლოვეს შექმნილი ვითარებით – ტრაფარეტებით იდგნენ, ბილეთებს ეძებდნენ და 1200 ევროსაც კი იხდიდნენ თითო ბილეთში, თუმც ამაოდ, ბილეთები არ იყო.
ენდრიუ სვიფტის სტადიონის ტრიბუნაზე სახალისო მეთოდზე შეღწევის შესახებ უკვე ვთქვით, ამსტერდამელი ჩვენიანის გზა კი გაცილებით რთული იყო… “ალიანც არენას” ერთერთ ცალკე შესასვლელთან, სადაც პირველი ეტაპის ბარიერი იყო გადასალახი, ვიდრე დაცვა სხვათა იდენტიფიკაციას ახდენდა, ქართველი მოულოდნელად ბარიერს მიღმა აღმოჩნდა, ოღონდ ეს ისეთი სისწრაფით მოხდა, ის წამშივე მეორე ბარიერთან იდგა, სადაც უკვე შემთხვევითი ხალხი ვერ ხვდება. ის განსაკუთრებულ პიროვნებად მიიჩნიეს, თუმც სხვებთან ერთად გაჩხრიკეს და თავაზიანად მიუთითეს მესამე კარისკენ, რომლის მიღმაც უკვე ერთი ნაბიჯი რჩებოდა მთავარ არენამდე. ბილეთების მოლოდინში ბუნებრივია, სხვებიც იდგნენ, მათთვის კი, არენაზე გასასვლელი საშვები ცალკე იდო. ჰოდა, მოგვიანებით შეხვედრისას, როგორც თავად გვიამბო, ერთერთი საშვის უჩუმრად აღება მოუხერხებია და საქმიანი ნაბიჯით ბოლო ბარიერისკენ დაძრულა, იქ კი… ჩვენიანი თავაზიანი ღიმილით შეაცილეს არენაზე, სადაც უკვე მანუელ ნოიერის სიახლოვეს აღმოჩნდა… მოქნილ-მოხერხებულობაც ამას ჰქვია.საინტერესო კია, ეს მართლაც გრანდიოზული არენა ენდრიუ სვიფტის და ამსტერდამელი ქართველის გარდა, კიდევ რამდენი შეპარვის ფაქტსა და მეთოდს იცნობს…
