• ინგლისში რეფორმა მზადდებაო, არ გაგიგია?
  • არ გამიგია. მთელი მაგათი რეფორმა იმაში, რომ ვიღაც ტყიურები მიჰყავთ და მერე ვარსკვლავებს ეძახიან.
  • და რა ეშველება ინგლისურ ფეხბურთს?
  • რა უნდა ეშველოს. სანამ მოკლე შვებულებას არ გააუქმებენ, არაფერი გამოვა.
  • ეგ მოკლე შვებულება რაღაა?
  • რაღაა და ისაა, რომ რომელიმე გამორჩეული თამაშის წინ მთელ გუნდს სხვა ქალაქში წაიყვანენ.
  • რატომ?
  • რომ დათვრნენ და იქაური პაბები დალეწონ. მერე კიდევ იქაურ ქალებს ან სულაც ერთმანეთს დაერიონ.
  • ეგ როგორ?
  • როგორ და ისე. „სიტი“ რომ კუნძულ ჯერსიზე წავიდა საქეიფოდ, მერე ვიღაც ბიგლიმ რომ ქალს ძუძუზე წაავლო ხელი და ქინქლაძე რომ სუდში დაიბარეს…
  • არ მახსოვს.
  • როგორ არ გახსოვს?
  • არა, თვითონ „სიტი“ რა არის, ეგ არ მახსოვს.
  • ის ხომ გახსოვს, წინა კვირაში რომ შუა დუბლინში შირერმა გილესპი გალახა?
  • უიმე, შირერი მაგას არ იკადრებდა, როგორ მოუვიდა?
  • მოუვიდა. არა ის, ლაბანოვსკიმ თქვა, შირერი ეგოისტიაო. ან რომელი ლორდი კავენდიში ეგა მყავს, არ ეკადრა? ერთი გლეხის ბიჭია. მუქთ ჰურსა სჭამს.
  • რეებს ბედავ შირერზე. მუქთს რატომ?
  • აბა ფეხბურთს ეგ აღარ თამაშობს და დადის კასტილით, ვინ არის, ჯონ სილვერია? რატომ უნდა ვითმინოთ მაგის მუქთახორობა?
  • და გილესპიმ რაღაო?
  • მილიციაში არ მისულა. ძმაკაცს გადაურეკა და შირერს უნდა ელაპარაკონ.
  • ვინ? ძველი ბიჭები არიან?
  • თან კი და თან არა. ერთი ხოტორა კლიენტია, ჯულიან დიკსი და კიდევ ერთი ხოტორა კლიენტია, დენის უაიზი. ლონდონელი მასტები არიან. „ვესტ ჰემში“ და „ჩელსიში“ სტოსი მიყავთ.
  • სტოსი რა არის?
  • კაპიტნები არიან, რაღა. კაი პურისმჭამელი და კაი სიტყვის მთქმელი ბიჭები. გილესპისთან ახლობლობენ.
  • უიმე, რამე არ უქნან შორერს. მსოფლიოს ჩემპიონატზე რა გვეშველება?
  • ეგ არაფერი, ოუენი გამოვა წესიერი ბოვში.
  • ეგენი მოკლავენ შირერს.
  • ეგრე არ არის. ამასაც ყავს ახლობლები იმათ ჩაიყვანს.
  • ვინ?
  • ერთი მაგარი ბიჭია, დეივ ბეტი, მაგარი პროშლი აქვს. შირერი იყო ასული და, აპრავდანიას აგაღებინებო, ბეტიმ უთხრა, კიდევ ერთია, რობ ლი, ეგეც ნიუკასლელი. შირერის ჩერეზძმაკაცია და გამკეთებელი კლიენტია.
  • საშინელი ამბავი ატყდება. შუაში ჩამდგომი არავინ არაა?
  • კანტონა რომ იყოს, იცოცხლე, ის ჩაუდგებოდა შუაში, სიტყვას მაინც დატოვებდა, ახლა არავინ ჩანს.
  • დალგლიში არაფერს აკეთებს?
  • წავიდეს მაგის ქარაქუცა… დაიმალა, ტო, ალანა და დეივა ავიდნენ,დავილაპარაკოთო და ცოლი გამოუშვა, სახლში არ არიო. როგორ არ იყო? მანქანა ქვემოთ ეყენა.
  • იან რაიტი რომ ჩაერიათ? შავია მაინც…
  • უთხრეს და მე მაგათ რიჟა საქმეში არ გავერევიო.
  • აბა ბერხკამპს ხო არ ეტყვიან?
  • არა. ტო, მანდ სად არის ბერხკამპის სალაპარაკო.
  • და გაზა? გაზა იტყოდა თავის სიტყვას.
  • რა, გაზა?
  • გაზა ჩარიონ. გაზაზე უკეთეს ვინ იტყვის?
  • გიჟია ტო, ეგრევე მიჭრის ვინმეს. თან ეხლა ვერ არი, ხო იცი…
  • და კოლინ ჰენდრი, ან დიური, ან ალი მაკოისტი?
  • მაიცა რა, მაგ საქმეში ქაჯი შოტლანდიელების გარევა იქნება?

14.03.1998

წილი
წინა სტატიახუთი ელემენტი
შემდეგი სტატიასაქართველო ოქრო-ვერცხლით
გიო ახვლედიანი
გიო ახვლედიანს „სარბიელში“ ხუმრობით ცოცხალ კლასიკოსს ვეძახდით, თუმცა რაღა ხუმრობით, ერთი კრიტიკოსის აზრით, 90-იანი წლების ქართული პროზა გიო ახვლედიანის, იგივე აკა მორჩილაძის დროება იყო. „სარბიელში“, მაგალითად, ინგლისური პრემიერლიგის ამბებს მიმოიხილავდა ირაკლი გამყრელიძის ფსევდონიმით, საკრივო ამბებს კი ალბერტ ხაჩატურიშვილის სახელით. მეტწილად ცხოვრობს ლონდონში, „სარბიელში“ მუშაობისას კი მის ოთახში, კედელზე მიჭედებულ ლურსმანზე ეკიდა ჰოლმსისეული სამონადირეო ქუდი.