გოგა ბითაძის ჩერნოგორიულ „ბუდუჩნოსტში“ გადასვლა, ალბათ, მაინც სწორი გადაწყვეტილება იყო. მართალია ჩვენიანის ახალი გუნდი ევროლიგაში ციდან ვარსკვლავებს ვერ წყვეტს და ბოლოსწინა ადგილზეა, საგიეროდ, ქართული კალათბურთის უკვე ამოსული ვარსკვლავის დამატების შემდეგ ჩერნოგორიელთა თამაშის მიმართ მედიისა და სპეციალისტების ყურადღება გაათკეცდა.ბითაძემ იმედები არც ამჯერად გააცრუა და იტალიაში მასპინძელ „მილანს“ 23 ქულა უთავაზა. ამას გარდა, გოგამ 8 მოხსნა და 2 შედეგიანი გადაცემაც მიითვალა. ჯამში მისი სასარგებლო მოქმედებების კოეფიციეტი ორივე გუნდის შემადგენლობაში საუკეთესო იყო – 31.
ბითაძე სასტარტო შემადგენლობაში არ ყოფილა, თუმცა სათამაშო დროის სიმცირეზე ვერ დაიწუწუნებს. მან ჯამში მოედანზე 26.50 წუთი დაჰყო. გოგაზე მეტი პარკეტზე (ისიც, მხოლოდ 15 წამით) გუნდის 30 წლის ცენტრმა ერლ კლარკმა დაჰყო. ჩერნოგორიელთა დამრიგებელი იასმინ რეპეშა ერთი ხელის მოსმით ვერ ელევა ამერიკელს და გუნდის თამაში ორ ცენტრზე ააწყო, თუმცა ამ სქემაში გოგა კლასიკური ცენტრი არ არის და მძიმე ფორვარდობასაც ითავსებს.
ჰო, შეხვედრა „მილანმა“ 111:94 მოიგო, მორიგ საევროლიგო შეხვედრას კი „ბუდუჩნოსტი“ 9 იანვარს ისრაელში, „მაკაბისთან“ გამართავს
