უეფამ უკვე დაამტკიცა კიდევ ერთი ევროტურნირის ფორმატი, რომელიც 2021 წლის ზაფხულში დაიწყება. ჯერჯერობით მოუნათლავ ტურნირს ისეთივე საშეჯიბრო ბადე ექნება, როგორიც ჩემპიონთა ლიგას და ევროპის ლიგას.
32 გუნდი ჯგუფურ ეტაპზე 8 ქვეჯგუფში იასპარეზებს, მერე კი ფლეი-ოფის სტადია დაიწყება. ფლეიოფში პირდაპირ გავა 8 ჯგუფის გამარჯვებული. მეორეადგილოსნებს მერვედფინალის საგზურის მოსაპოვებლად ევროპის ლიგის ჯგუფურ ეტაპზე მესამე ადგილზე გასულებთან მოუწევთ ჭიდილი.
ჯამში ახალი ტურნირის ბადე 15 საშეჯიბრო დღეს მოიცავს და 141 მატჩზეა გათვლილი – ისევე, როგორც ევროპის ლიგაში. ამ ორი ტურნირის მატჩებიც ერთსა და იმავე დღეებში, ხუთშაბათს გაიმართება, სამშაბათი და ოთხშაბათი კი კვლავაც ჩემპიონთა ლიგის განკარგულებაში დარჩება.
რაც შეეხება ევროტურნირების ფინალებს, ერთ კვირაში ჩაეტევა: ოთხშაბათს ახალი ტურნირი, ხუთშაბათს ევროპის ლიგა, შაბათს კი ჩემპიონთა ლიგა.
რაღაცით ინტერტოტოს თასის ასოციაციაც გაჩნდა. უეფას სურვილი გასაგებია: მეტ კლუბს გაუხსნას ევროტურნირებისკენ გზა და გააფართოვოს სატელევიზიო ბაზარი.
გასაგებია ჩვენი ინტერესიც: ყოველი მორიგი ევროსაგზური ქართული კლუბებისთვის ჩინებული სკოლა და განვითარების ახალი ბიძგი იქნება.
ორწელიწადნახევარიღა დარჩა.
