გასულ შაბათს „დინამომ“ ის დრო გაგვახსენა, ეროვნული ჩემპიონატის პირველ წლებში რომ მიგვაჩვია. ქინქლაძე-არველაძეების თაობა რამდენიმე თავით მაღლა იდგა მოწინააღმდეგეებზე და ერთ მატჩში 8 თუ 10 გოლი იშვიათობა არ იყო. 12:4-იც გვახსოვს 1993-ში, „დინამომ“ რუსთავის „გორდას“ რომ მოუგო. ეს მატჩი დღემდე ყველაზე უხვგოლიანად ითვლება ეროვნული ჩემპიონატების ისტორიაში.
„დინამოს“ ოფიციალური ვებ-გვერდი კი გვამცნობს, რომ სტუმრად 8 ბურთი „ლურჯ-თეთრებმა“ ისტორიაში მეორედ გაიტანეს. მანამდე ასეთი რამ 1996 წელს, ყვარელში მომხდარა, როცა „დურუჯისთვის“ 8:2 მოუგიათ.
ამჯერად დინამოელთა „მსხვერპლი“ „სამტრედია“ გახდა. მატჩი ზესტაფონში ჩატარდა და მაყურებელმა ყველანაირი გემოვნების გოლი იხილა. ერთ მატჩში სამი დუბლიც იშვიათობაა. ამჯერად 2-2 გოლი აკაკი შულაიამ, ბუდუ ზივზივაზემ და გიორგი ივანიშვილმა გაიტანეს. თითოც მათე ვაწაძემ და ლაშა თოთაძემ დაამატეს. ზივზივაძემ ორი საგოლე გადაცემაც მიითვალა, ჯამში 8 მოუგროვდა და ამ მაჩვენებლით მხოლოდ გორელ ლეანდრო რიბეიროს (11 პასი) და ოთარ კიტეიშვილს (9) ჩამორჩება.
მოკლედ, „დინამომ“ 8:1 მოიგო და ამ გამარჯვებით კიდევ უფრო მიუახლოვდა ლიდერ „საბურთალოს,“ რომელმაც გორში უგოლო ფრე ითამაშა „დილასთან.“
ახლა 1-2 ადგილოსნებს შორის სხვაობა 5 ქულაა და დინამოელებს თამაშით ნაკლები აქვთ ჩატარებული. ამ შეხვედრას ისინი 31 ოქტომბერს გამართავენ საკუთარ სტადიონზე „ტორპედოსთან.“ საინტრესოა, რომ ოთხ დღეში მათ კიდევ მოუწევთ შეხვედრა, ოღონდ, ამჯერად 31-ე ტურის გრაფიკით და ქუთაისში.
„ასპროცენტიანი“ გამოდგა „ჩიხურასთვის“ ოქტომბრის თვე. ზემოიმერლებმა ოთხივე კალენდარეული მატჩი მოიგეს და 53 ქულით მესამე ადგილზე დგანან. ამ ადგილისთვის ასევე „ტორპედო“ და „დილა“ იბრძვიან. ამიტომ, „ტორპედო“ – „დინამოს“ მოკლე ხანში ორჯერ დაპირისპირება, ჩვენებურ „კლასიკოს“ გაცილებით შინაარსიანს ხდის.
30-ე ტური: რუსთავი 1:2 ჩიხურა, კოლხეთი 1:1 სიონი, სამტრედია 1:8 დინამო, დილა 0:0 საბურთალო, ლოკომოტივი 0:1 ტორპედო
სატურნირო მდგომარეობა
| გუნდი | თამაში | მოგება | ფრე | წაგება | ბურთები | ქულა |
|---|---|---|---|---|---|---|
| საბურთალო | 36 | 24 | 7 | 5 | 64:29 | 79 |
| დინამო | 36 | 21 | 6 | 9 | 73:38 | 69 |
| ტორპედო | 36 | 20 | 9 | 7 | 66:25 | 69 |
| ჩიხურა | 36 | 19 | 7 | 10 | 54:33 | 64 |
| დილა | 36 | 17 | 12 | 7 | 60:40 | 63 |
| ლოკომოტივი | 36 | 12 | 8 | 16 | 43:55 | 44 |
| რუსთავი | 36 | 8 | 13 | 15 | 33:44 | 37 |
| სიონი | 36 | 8 | 7 | 21 | 39:65 | 31 |
| სამტრედია | 36 | 4 | 9 | 23 | 28:81 | 21 |
| კოლხეთი | 36 | 4 | 8 | 24 | 26:76 | 14 |
კოლხეთს დაკლებული აქვს 6 ქულა
31-ე ტური
2 ნოემბერი: ჩიხურა – ლოკომოტივი
3 ნოემბერი: სიონი – დილა, საბურთალო – რუსთავი
4 ნოემბერი: კოლხეთი – სამტრედია, ტორპედო – დინამო
მეგოლეები: გიორგი გაბედავა (ჩიხურა) – 17, ბუდუ ზივზივაძე (დინამო) – 16, მიკოლა კოვტალიუკი (დილა) – 15, ლეანდრო რიბეირო (დილა) – 13, ოთარ კიტეიშვილი (დინამო/შტურმი ავსტრია) – 11, ლევან კუტალია (ტორპედო) – 10, მამია გავაშელიშვილი (ლოკომოტივი), ვაგნერ გონსალვეში (საბურთალო) – 9
