აკი, გუშინვე ვწერდით, რომ ნიკოლოზ ბასილაშვილის მორიგი გამარჯვება გვეიმედებოდა.ბრიტანელი კაილ ედმუნდი კერკეტი კაკალია, მაგრამ არა გაუტეხავი. გატყდა კიდეც და ჩინეთის ღია პირველობის ფინალს ქართველი ითამაშებს.
პირველი სეტი ზუსტად ერთ საათს გაგრძელდა და ნამდვილი თრილერი გამოდგა. სასტარტო ორ გეიმში ბრეიკების გაცვლის შემდეგ მეტოქენი კბილებით ჩაეჭიდნენ საკუთარ მოწოდებას. ამის მიუხედავად, ედმუნდმა 5:4-ზე სამი სეტბოლი მოიპოვა და ნიკამ ერთიც არ დაანება. საქმე ტაიბრეიკამდე მივიდა. აქ უკვე ჩვენებურმა მიიღო ერთი დარტყმით სეტის მოგების სამი შანსი და მესამე ხელიდან აღარ გაუშვა – 7:6 (8:6).
მეორე სეტში ბრიტანელი თითქოს გატყდა ნიკამ ჯერ 3:0, მერე კი 4:1 და 5:2 უპირატესობაც მიიღო, როცა, მეტოქე გამოცოცხლდა, რებრეიქიც შეასრულა ნიკას 5:4-ზე თავად აწვდიდა. აქ უკვე ქართველმა არაქართულად მტკიცე ნერვები ჩართო საქმეში, ერთბაშად სამი მატჩბოლი მეტოქის მოწოდებაზე დაიმსახურა და მეორე ცდიდან ფინალში შეაბიჯა – 7:6 (8:6), 6:4.
ახლა მონაგარი: 300 სარეიტინგო ქულა ნიკოლოზ ბასილაშვილს ტოპ-30 ჩოგბურთელში ფეხის მყარად მოკიდების გარანტიას აძლევს. ფინანსურად კი ჩვენებურმა საბანკო ანგარიში 359 510 დოლარით გაიმდიდრა.
წინ ფინალია, რომელშიც ნიკას მსოფლიოს არგენტინელი N4 ჩოგანი ხუან მარტინ დელ პოტრო ელოდება. დელ პოტრო აგერ, აგვისტოში სულაც მესამე ჩოგანი იყო. კარიერაში 22 ტიტულის და მათ შორის აშშ-ის ღია პირველობის მომგებს, ორგზის ოლიმპიურ პრიზიორს და დევისის თასის გამარჯვებულს კარიერაში 25, მხოლოდ ამ სეზონში კი 5 მილიონ დოლარზე მეტი უშოვია…
ვერაფერს იტყვი: ორმეტრიანი დელ პოტრო ნამდვილი მონსტრია და დამატებითი ფორაც აქვს: ნახევარფინალში ფაბიო ფოგნინი არ გამოუცხადდა და ერთი დღით მეტს დაისვენებს ფინალის წინ. ეგ არაფერი. ნიკოლოზ ბასილაშვილმა შესაძლებლობის მაქსიმუმი უკვე გააკეთა და ფინალში თითქმის შეუძლებელსაც შეეჭიდება.
