ინტრიგა დაბრუნდა

„დინამომ“ ნავსი გატეხა, თანაც როგორ შეხვედრაში, მატჩში, რომელიც, შესაძლოა, გადამწყვეტიც აღმოჩნდეს წლევანდელ სეზონში. „საბურთალოს“ ორჯერ მოეგო წლეულს „დინამოსთვის“, აპრილში სტუმრად და ივნისში შინ, ორივეჯერ მინიმალური ანგარიშით. ამჯერადაც იგებდნენ გაგი მარგველაშვილის გოლით, მაგრამ მეორე ტაიმში ჯერ გიორგი რეხვიაშვილმა ჩაჭრა ბურთი საკუთარ კარში (ეს მე-13 ავტოგილი გახლდათ სეზონში), მესამე დამატებულ წუთზე კი ლევან შენგელიამ ულამაზესი გამარჯვების გოლი გაიტანა ცაციათი, საჯარიმოს კუთხიდან, შორეულ დაბალ კუთხეში.

ახლა დინამოელები 5 ქულით ჩამორჩებიან ლიდერ საბურთალოელებს და თამაშით ნაკლები აქვთ. ასე რომ, საჩემპიონო ინტრიგა დაბრუნდა. არადა, „საბურთალოს“ 11 ტური აღარ წაეგო. გიორგი ჭიაბრიშვილის შეგირდები ბოლოს 20 მაისს „დილასთან“ დამარცხებულიყვნენ (1:4).

ტურის ყველაზე უხვგოლიანი შეხვედრა კი „მიხეილ მესხის“ სათადარიგო მოედანზე გაიმართა, სადაც „მასპინძელმა“ „სამტრედიამ” „დილასთან“ 3:5 წააგო. დუბლი მიითვალეს გორელთა ლეგიონერებმა, უკრაინელმა მიკოლა კოვტალიუკმა და ბრაზილიელმა ლეანდრო რიბეირომ. ეს სეზონის 28-ე და 29-ე დუბლები გახლდათ. სამტრედიელებმა პირველად ითამაშეს ახალი მთავარი მწვრთნელის, გიორგი დარასელიას ხელმძღვანელობით. გორელებმა კი უმნიშვნელოვანესი სამი ქულა მოიპოვეს და მესამე ადგილზე მყარად დამკვიდრდნენ. მათმა უშუალო კონკურენტმა „ჩიხურამ“ ხომ ქუთაისში დათმო შეხვედრა „ტორპედოსთან.“ საინტერესოა, რომ ეს საჩხერელთა ზედიზედ მესამე მარცხი გახლდათ.

„რუსთვმა“ და „კოლხეთმა“ ერთმანეთს ვერ გაუტანეს. „ლოკომოტივმა“ კი „სიონს“ ოთარ კობახიძის გოლით აჯობა.

24-ე ტური: სამტრედია 3:5 დილა, ლოკომოტივი 1:0 სიონი, დინამო 2:1 საბურთალო, რუსთავი 0:0 კოლხეთი, ტორპედო 1:0 ჩიხურა

სატურნირო მდგომარეობა

25-ე ტური

21 სექტემბერი: კოლხეთი – ლოკომოტივი

23 სექტემბერი: სიონი – დინამო, საბურთალო -ტორპედო, დილა – რუსთავი

24 სექტემბერი: ჩიხურა – სამტრედია

მეგოლეები: გიორგი გაბედავა (ჩიხურა) – 14, მიკოლა კოვტალიუკი (დილა) – 13, ბუდუ ზივზივაძე (დინამო). ლეანდრო რიბეირო (დილა) – 12, ოთარ კიტეიშვილი (დინამო/შტურმი ავსტრია) – 11, მამია გავაშელიშვლი (ლოკომოტივი)- 9