ფრენბურთში მსოფლიო პირველობაზე A-ჯგუფის თავში აშკარა ფავორიტის სახით იტალიის ნაკრები მიგელავს, რომელმაც სამ შეხვედრაში მხოლოდ ერთი პარტია წააგო და იაპონიის მუსვრას ბელგიელთა და არგენტინელთა დაწიხლვაც მიაყოლა. მომდევნო ჯგუფურ ეტაპზე გასასვლელი სამი ადგილისთვის ოთხი გუნდი იბრძვის (გარდა საცოდავი დომინიკის რესპუბლიკის ნაკრებისა). მეორე ადგილზე გასაჭრელად საკვანძო თამაში გუშინ სლოვენიამ მოუგო ბელგიას. 0:2 ჩამორჩენის შემდეგ სამხრეთელმა სლავებმა უმაგალითო სიჯიუტე გამოამჟღავნეს და ზედიზედ ორი სტანდარტული პარტიის მოგებას ზედ ტაი-ბრეკიც მიაყოლეს. საეჭვოა, მეორე ადგილიდან მათი მოშორება მოხერხდეს, იტალიასთან ბოლო ტურში უძნელესი შეხვედრის გათვალისწინებითაც კი. მომდევნო ეტაპის ერთი ზედმეტი ნაკრები არგენტინას, ბელგიასა და იაპონიას შორის უფროა საძიებელი.
B-ჯგუფში ყველაფერი ნათელია. პირველმა ჯგუფურმა ეტაპმა ჯერ მხოლოდ გადაიარა ეკვატორი, მაგრამ დანამდვილებით ითქმის (და შეიძლებოდა თქმულიყო ჩემპიონატის დაწყებამდეც), რომ მეორე ჯგუფურ ეტაპზე გავლენ კანადა, საფრანგეთი, ჰოლანდია და ბრაზილია. ჩინეთი და ეგვიპტე ურთიერთშეხვედრაში გაარკვევენ, ერთადერთი მატჩის მოგებას ვინ მოახერხებს და გუდა-ნაბადს აიკრავენ, მსოფლიო ფრენბურთის ოთხმა ხარკამეჩმა კი უკვე მოახერხა ერთმანეთში ფიცხელი რქენის გამართვა და უაზრო ჩავარდნებითაც გააკვირვა ფრენბურთის ქომაგი. დიდად შეუხედავი იყო პირველ ტურში ჰოლანდია კანადასთან (0:3 – 15:25, 23:25, 18:25), მაგრამ შემდეგ ჩინეთი დასცა და მესამე ტურში თვით ბრაზილიას არ დაუტოვა შანსები (3:1 – 21:25, 25:20, 25:20, 25:21). ამ უკანასკნელს კი მანამდე დრამატული თამაში მოეგო ფრანგთათვის (3:2 – 25:20, 25:20, 21:25, 23:25, 15:12) და ტიტების ქვეყნელებთან ასე რამ გამოფიტა, ძნელი სათქმელია. ჯერჯერობით მხოლოდ კანადა იძვრის სატურნირო ცხრილში უდანაკარგოდ, მაგრამ უფრო მაჩანანჩალათა ხარჯზე. დასკვნით ტურებში ნეკერჩხლის ფოთლოსნებს ორი სერიოზული გამოცდა ელით: ჯერ ბრაზილიასთან, მერე საფრანგეთთან და მათი ბიჭობა, აბა იქ გამოჩნდება!
სერბეთთან ძნელი მოგების შემდეგ C-ჯგუფის ლიდერ ამერიკის შეერთებული შტატების ნაკრებს ერთობ მისჭირდა ავსტრალიასთანაც (3:2 – 25:23, 25:20, 22:25, 23:25, 15:10) და ზედიზედ მეორე ქულის დაკარგვით გაბრაზებულმა მესამე ტურში ჯავრი ევროპის ჩემპიონ რუსეთზე იყარა. აღნიშნულ ჯგუფს ასევე ჰყავს თავის მაჩანჩალა ტუნისი და არც კამერუნის ნაკრები ჰგავს მომდევნო ეტაპზე გამსვლელს.
მსოფლიოს მოქმედი ჩემპიონი პოლონეთი და აზიის ნომერ პირველი ირანი მოგებათა მაქსიმუმით D-ჯგუფს უძღვიან წინ და ერთმანეთს ხვალ შეხვდებიან. მასპინძელი ბულგარეთი და ფინეთი დიდი ალბათობით მომდევნო რაუნდში გავლენ, რადგან ანტილის კუნძულებიდან მოსულ ნაკრებებს (კუბა, პუერტო-რიკო) სიცოცხლის ნიშანწყალი არ ეტყობათ, აგებენ და აგებენ…
სატურნირო მდგომარეობა სამი ტურის შემდეგ
ჯგუფი A
| ნაკრები | თამაში (მოგება-წაგება) | პარტია (მოგება-წაგება) | ბურთები (ჩაგდებული-მიღებული) | ქულა |
|---|---|---|---|---|
| იტალია | 5-0 | 15-2 | 423-326 | 15 |
| ბელგია | 3-2 | 11-8 | 419-394 | 10 |
| სლოვენია | 3-2 | 12-10 | 479-463 | 9 |
| არგენტინა | 2-3 | 10-11 | 475-469 | 6 |
| იაპონია | 2-3 | 8-11 | 414-427 | 5 |
| დომინიკის რესპუბლიკა | 0-5 | 1-15 | 267-398 | 0 |
ჯგუფი B
| ნაკრები | თამაში (მოგება-წაგება) | პარტია (მოგება-წაგება) | ბურთები (ჩაგდებული-მიღებული) | ქულა |
|---|---|---|---|---|
| ბრაზილია | 4-1 | 13-6 | 439-405 | 11 |
| ჰოლანდია | 4-1 | 12-8 | 455-420 | 11 |
| საფრანგეთი | 3-2 | 13-7 | 456-420 | 11 |
| კანადა | 3-2 | 11-7 | 426-408 | 9 |
| ეგვიპტე | 1-4 | 4-13 | 368-426 | 3 |
| ჩინეთი | 0-5 | 3-15 | 375-440 | 0 |
ჯგუფი C
| ნაკრები | თამაში (მოგება-წაგება) | პარტია (მოგება-წაგება) | ბურთები (ჩაგდებული-მიღებული) | ქულა |
|---|---|---|---|---|
| აშშ | 5-0 | 15-5 | 456-383 | 13 |
| სერბეთი | 4-1 | 14-7 | 476-430 | 12 |
| რუსეთი | 3-2 | 12-6 | 422-366 | 10 |
| ავსტრალია | 2-3 | 9-11 | 428-442 | 7 |
| კამერუნი | 1-4 | 4-12 | 334-398 | 3 |
| ტუნისი | 0-5 | 2-15 | 317-414 | 0 |
ჯგუფი D
| ნაკრები | თამაში (მოგება-წაგება) | პარტია (მოგება-წაგება) | ბურთები (ჩაგდებული-მიღებული) | ქულა |
|---|---|---|---|---|
| პოლონეთი | 3-0 | 15-3 | 445-343 | 15 |
| ირანი | 4-1 | 12-7 | 437-400 | 11 |
| ბულგარეთი | 3-2 | 11-6 | 395-368 | 9 |
| ფინეთი | 2-3 | 9-12 | 453-471 | 6 |
| კუბა | 1-4 | 6-13 | 392-436 | 3 |
| პუერტო-რიკო | 0-5 | 3-15 | 331-435 | 1 |
