40 წლის ჯიჯი ბუფონი „იუვენტუსიდან“ პარი-სენ-ჟერმენში გადავიდა, სადაც… ვეასთან ერთად ითამაშებს – ლიბერიის პრეზიდენტის ჟორჟ ვეას 18 წლის შვილი ტიმოტი ვეა და უბერებელი ბუფონი თანაგუნდელები გახდნენ.
განსაკუთრებული ამ ამბავში არაფერი იქნებოდა, რომ არა ერთი ფაქტი: 1995 წლის 19 ნოემბერს „პარმა“–„მილანის“ მატჩში 17 წლის ბუფონის დებიუტი შედგა, სტუმართა გუნდში კი თამაშობდა… 29 წლის ლიბერიელი მეგოლე ჟორჟ ვეა, რომელმაც იმ შეხვედრაში ვერ გაიტანა – 0:0.
ისე გამოვიდა, რომ ბუფონს მამა ვეას წინააღმდეგ დებიუტი ჰქონდა, ახლა კი მისი შვილის თანაგუნდელი გახდა და ამ ამბებს შორის 23 წელი გაპარულა.
2001-ში იტალიელი მეკარე გადაბარგდა „იუვენტუსში“ და 17 წელი გაატარა ტურინულ კლუბში, ჟორჟ ვეამ კი 2003-ში „ალ ჯაზირაში“ დაასრულა კარიერა. ჯიჯი კარის ჩარჩოდან არ გამოდის, ჟორჟ ვეა კი გასულ ზამთარს ლიბერიის პრეზიდენტი გახდა.
