ლეგენდარულ ტიერი ანრის პოლ პოგბას შესახებ ჰკითხეს. შეუძლია კი საფრანგეთის ნაკრების ნახევარმცველს კარგი ფორმის სტაბილურად შენარჩუნება? პრემიერლიგის ბოლო ტურში, „ვესტ ბრომვიჩ ალბიონთან” მან ცუდად ითამაშა და ჟოზე მოურინიუმ მეორე ტაიმში შეცვალა.
რასაკვირველია, „ვესტ ბრომვიჩთან” მთელმა „იუნაიტედმა” ცუდად ითამაშა, შინ 0:1 წააგო, მაგრამ როდესაც ვარსკვლავად იწოდები და შენში 105 მილიონი ევროა გადახდილი, მეტი მოგეთხოვება.
არადა, ერთი კვირის წინ, მანჩესტერულ დერბიში, სადაც „სიტი” 2:0-ს იგებდა, პოგბამ გაიბრწყინა, ორი გოლი შეაგდო და 3:2 გამარჯვებაში დიდი წვლილი შეიტანა.
„იუნაიტედისა” და „ვესტ ბრომვიჩის” შეხვედრას თავიდანვე რაღაც უცნაური სდევდა, — თქვა ტიერი ანრიმ, — უცნაური განწყობა იყო სტადიონზეც, უცნაური განწყობა ეტყობოდა მანჩესტერელთა გუნდსაც. ეს ყველაფერი ძალიან განსხვავდებოდა იმისგან, რაც ერთი კვირის წინ დერბის დროს ვიხილეთ. აღარ ჩანდა თავდადება, საბრძოლო განწყობა. სწორედ მაშინ ვკითხე საკუთარ თავს, შეუძლია კი პოგბას სტაბილურად თამაში? სამწუხაროდ, პასუხად არა მივიღე.”
ჯეი როდრიგესის გოლით „ვესტ ბრომვიჩმა” „იუნაიტედი” დაამარცხა, რაც სენსაციის ტოლფასი შედეგი იყო. თამაშის მიწურულს „ოლდ ტრეფორდზე” შეკრებილმა ფანობამ თავის გუნდს ტრიბუნებიდან „ბუუუ” დასსძახა, ქალაქ მანჩესტერის ლურჯმა ნახევარმა კი ჩემპიონობის ზეიმი დაიწყო.
ტიერი ანრის სწამს, რომ „იუნაიტედის” მწვრთნელი ჟოზე მოურინიუ დერბის მეორე დღიდანვე ხედავდა, რომ მის ფეხბურთელებს განწყობა შეეცვალათ, ბრძოლის ჟინი გაუქრათ და მომხდარს ყველაზე მეტად განიცდის.
„მოურინიუ მთელი კვირის განმავლობაში ცდილობდა ფეხბურთელების მოთოკვას, რისი გამოცდილებაც მას იცოცხლე, აქვს. მწვრთნელი იმთავითვე ხედავდა, რაც მოხდებოდა „ვესტ ბრომვიჩთან” შეხვედრაში. ის აფრთხილებდა ფეხბურთელებს, რომ იოლი თამაში არ ელოდათ და ახლა მეც სწორედ ეს მინდა ვკითხო როგორც პირადად პოგბას, ისე მთელ „მანჩესტერ იუნაიტედს”: რატომ არ შეგიძლიათ მთელი სეზონის განმავლობაში ისე ითამაშოთ, „სიტის” წინააღმდეგ რომ ითამაშეთ?
„ვესტ ბრომვიჩი” კარგად გაშალაშინებული გუნდია, რომელსაც უნდოდა მეტოქისთვის პრობლემა შეექმნა და მან ეს შეძლო. უკვე მეათე წუთზე მივხვდი, რომ მოედანზე რაღაც განსხავებული ხდებოდა და მართლაც, შეხვედრის ერთადერთი გოლი სტუმრებმა გაიტანეს”, — თქვა ანრიმ.
