„რეალის“ კაპიტანმა სერხიო რამოსმა ტურინის „იუვენტუსთან“ გუშინდელი დაპირისპირება ყვითელი ბარათების სიჭარბის გამო გამოტოვა და საქმეს ისეთი პირი უჩანს, მადრიდელთა დაცვის ბურჯს პირველი ნახევარფინალის გამოტოვებაც მოუწევს. მიზეზი მისივე სულსწრაფობაა.
„იუვესთან“ მატჩს რამოსი ტრიბუნიდან ადევნებდა თვალს. ბოლო წუთებზე კაპიტანმა ჯერ ტრიბუნების ქვეშ განთავსებულ ოთახში, შემდეგ კი სულაც მოედნისკენ მიმავალ გვირაბში გადაინაცვლა. ამას კი დისკვალიფიცირებული ფეხბურთელითვის უეფას რეგულაციები კრძალავს და თითქმის გარანტირებულ დისკვალიფიკაციას სარჩულად დაედება.
არადა, გუშინ კიდევ ერთხელ დავრწმუნდით, რომ „რეალის“ დაცვა რამოსით და მის გარეშე ცა და მიწასავით განსხვავდება. ყოველ შემთხვევაში, მარიო მანჯუკიჩი ასე რომ ვერ იბატონებდა მეორე სართულზე, წყალი არ გაუვა.
