– ვერ გავიგე.
– -რა ვერ გაიგე?
– ოუენის ფეხები სამოც მილიონად დააზღვიესო.
– შენ ოუენი რა იცი?
– ოუენი მე კი არა, სტივ ვანდერმაც იცის.
– ეგ ხო ბრმაა?
– ჰოდა, მაგანაც.
– და რა გინდა?
– ფეხის დაზღვევა რაღაა?
– შენ ძველი დროის ასლამაზოვი გაგიგონია?
– ვინა?
-ასლამაზოვი, „დინამოს“ ფეხბურთელი.
– არა, მე პანიუკოვი გამიგონია.
– ასლამაზოვი იყო.
– მერე?
– მერე, ისეთი დარტყმა ჰქონდა, რომ ფეხი დაულუქეს.
– ეგ როგორ?
– როგორ და მარჯვენათი დარტყმა აუკრძალეს.
– რატომ?
– მეკარეები რომ არ მოეკლა.
– რაღა მეკარეს უმიზნებდა?
– ეეე… შტანგებსაც ამტვრევდა.
– მერე?
– მერე ერთი ორჯერ შეაპარა და „პიშჩევიკის“ მეკარე შემოაკვდა. თამაში აუკრძალეს…
– ეგ ოუენთან რა შუაშია?
– რო ეგრე აღარ აუკრძალონ.
– ოუენმა ვინ მოკლა?
– ეჰ… ოუენმა ჩემი გული მოკლა.
– როდის?
– აი, რუმინეთთან რომ წაუცაცუნა შტანგას…
– რეებს იხსენებ, რა დროს ეგ არის?
– მაშინ სხვა რამეს გკითხავ.
– აბა?
– აი, რა ჯობია ქვეყნისთვის, ერთი ოუენი თუ ნავთობსადენი?
– მაგათი შედარება არ შეიძლება.
– რატომ?
– ოუენი ჰა, ჰა, თხუთმეტ წელიწადს იქნება, ნავთობსადენი კი სულ.
– ხო, მაგრამ ნავთობსადენზე თხუთმეტი წელიწადია ლაპარაკობენ და ჯერ არ არის, ოუენზე კიდევ ჯერ ხმა არ ამოეღოთ და უკვე იყო.
– ნავთის და კაცის შედარება არ გამიგია.
– კაცია ბიჭო ოუენი?
– აბა ვინ არის?
– მომავალი სერ მაიკლ ოუენი.
– შენ რა იცი?
– ორმოცდაათისა რო გახდება, დედოფალი მისცემს.
– მაშინ დედოფალი იქნება?
– დედოფალი სულ იქნება.
– და გაზა?
– გაზაც სულ იქნება, თუ ინაპლანეტიანები არ წაიყვანენ.
– მაგას არ გეკითხები, გაზა ჯობია, თუ ნავთობსადენი?
– დღეს?
– ჰო, დღეს.
– დღეს ნავთობსადენი კი არა, ლუბოი ყველაზე მყრალი წყალსადენი ჯობია… ეჰ.
– მაშ გაზაზედ ხელი ჩაგიქნევია?
– მე კი არა, შერილმაც ჩაიქნია.
– შერილი ვინ არის?
– შენ ოუენის მეტი არავინ გაგიგია?
– მეტი რა საჭიროა, ყველაფერს ოუენი აკეთებს.
– ეგრეც ნუ იტყვი.
– რატომ?
– ბერლუსკონიმ არ გაიგოს, თორემ წაიყვანს და დასვამს ზაპასში. არც თქვენა და არც მეო.
– ბერლუსკონი ვინ არის?
– ერთი კაცია, ბიჭების შემგროვებელი.
– როგორ აგროვებს ბიჭებს?
– ყიდულობს და მერე ჭერში აწყობს.
– ვერ ყოფილა კარგი კაცი.
– ბარე ორს კიდევ ეგ ჯობია.
– ვის?
– გვარს არ დავასახელებ და ჩვენი კოლმეურნეობის თავმჯდომარე რომაა.
– ააა, გავიგე, გავიგე…
– ძალიან კარგი. მთავარია გაგება.
05.09.1998
