ინგლისში „კარაბაოს” ანუ „ლიგის თასი” „მანჩესტერ სიტიმ” მოიგო. პეპ გვარდიოლას გუნდმა ფინალში „არსენალი” გადათელა — 3:0. ეს გახლდათ კატალონიელი მწვრთნელის პირველი ჯილდო „ქალაქელთა” თავკაცის რანგში. მოგვიანებით „სიტის” ბელგიელმა ნახევარმცველმა კევინ დე ბრუინმა თავის „ტვიტერზე” დაწერა: „ეს ერთი! დანარჩენიც იქნება!”
„არსენალის” თამაშმა ინგლისური ტაბლოიდები ხუმრობის ხასიათზე დააყენა. ზოგმა „მეთოფეთა” დაცვას კომიკური უწოდა, „სანმა” კი შეხვედრის აღსაწერად ორიგინალურ ხერხს მიაგნო: გამოაქვეყნა ფოტო, როგორ ეჯახება მატარებელი გზაზე გაჩხერილ მსუბუქ მანქანას. აი, ასეთი თამაში იყოო.
მანჩესტერელთაგან გოლები გაიტანეს სერხიო აგუერომ, ვინსენტ კომპანიმ და დავიდ სილვამ.
