საბჭოთა კავშირის ჩემპიონატის დროს, არსებობდა ეგრეთ წოდებული, გრიგორი ფედოტოვის ასიანთა კლუბი, რომელშიც 100 და მეტი გოლის გამტანი ფეხბურთელები ხვდებოდნენ. ქართველთაგან კლუბში შვიდი მოთამაშე მოხვდა: რამაზ შენგელია 161 გოლი, ბასა ღოღობერიძე – 143. ზაურ კალოევი – 139, ბორის პაიჭაძე – 136, დავით ყიფიანი – 115, სლავა მეტრეველი და გივი ნოდია 113 – 113.
ყველაზე მეტი კი კიეველმა ოლეგ ბლოხინმა გაიტანა – 319 ( ციფრებში ყველა ტურნირზე გატანილი გოლები ითვლებოდა).
ამ რეკორდს ცხადია, ვეღარავინ გააუმჯობესებს, რადგან საბჭოეთის ქვეყანა აღარ არსებობს. აი, ინგლისის პრემიერლიგაში კი ოდინდელ რეკორდსმენ ალან შირერს ეტყობა სერიოზული კონკურენტი გამოუჩნდა.
კვირა ღამეს, „ლივერპულ“ – „ტოტენჰემის“ ფანტასტიკური მატჩის (2:2) 97-ე წუთზე, ჰარი კეინმა მასპინძელებს პენალტი გაუტანა და ეს მისი მე-100 გოლი აღმოჩნდა პრემიერლიგაში. ამით ის პრემიერლიგის ასიანთა კლუბის 27-ე წევრი გახდა. ამათგან, კეინის გარდა, მოქმედი მხოლოდ სამი ფეხბურთელია – „სიტის“ აგრენტინელი სერხიო აგუერო, „ევერტონის“ უეინ რუნი და „სტოკის“ აყლაყუდა შემტევი პიტერ კრაუჩი.
ყველაზე მეტი – 260 გოლი პრემიერლიგაში ალან შირერის ანგარიშზეა და ვარაუდობდნენ, რომ ამ რეკორდს დიდ ხანს ვერავინ შესწვდებოდა, მაგრამ ახლა ჩვენი ბრიტანელი კოლეგები ფიქრობენ, რომ არცთუ შორეულ მომავალში მას შეიძლება ჰარი კეინმა აჯობოს. საქმე ისაა, რომ „ტოტენჰემის“ ათიანმა ეს 100 გოლი 141 მატჩში გაიტანა. მასზე სწრაფად ამდენივე მხოლოდ შირერს გაეტანა (124 შეხვედრაში). ამიტომ თუ არა კეინის მძიმე ტრავმა ან უცხოეთში გადაბარგება, ალბათ რეკორდი გაუმჯობესდება.
„ეს უდიდესი წარმატებაა მისთვის. გულწრფელად მივულოცეთ. ძალიან ბედნიერი იყო და გვითხრა, რომ თანაგუნდელების თანადგომის გარეშე ვერაფერს მიაღწევდა,“ – დასძინა „ლივერპულთან“ მატჩის შემდეგ „ტოტენჰემის“ მწვრთნელმა მაურისიო პოჩეტინომ.
მატჩის შემდეგ გასახდელში კეინს საგანგებო ბუცები უსახსოვრეს, რომელზეც ციფრი 100 იყო გამოსახული. საჩუქრი მას მეკარე უგო ლორისმა გადასცა, შემდეგ კი ამ ამბის უკვდავსაყოფად გუნდური ფოტოც გადაიღეს.
პრემიერლიგის ასიანთა კლუბი
ალან შირერი 260
უეინ რუნი 208
ენდი კოული 187
ფრენკ ლამპარდ 177
ტიერი ანრი 175
რობი ფაულერი 163
ჟერმეინ დეფო 161
მაიკლ ოუენი 150
ლეს ფერდინანდი 149
ტედი შერინგემი 146
რობინ ვან პერსი 144
სერხიო აგუერო 139
ჯ. ფლოიდ ჰასელბაინკი 127
რობი კინი 126
ნიკოლა ანელკა 125
დუაიტ იორკი 123
სტივენ ჯერარდი 120
იან რაიტი 113
დიონ დაბლინი 111
ემილ ჰესკი 110
რაიან გიგზი 109
პოლ სქოულზი 107
დარენ ბენტი 106
პეტერ კრაუჩი 106
დიდიე დროგბა 104
მეტ ლე ტისიე 100
ჰარი კეინი -100
