21 წლის ლუმორ აგბენიენუმ პსვ-ს გუნდში გადასვლის პირობა ექვსი თვის წინ მისცა. კლუბმა ბილეთი დაუჯავშნა, იანვარში ეინდჰოვენში ჩასვლის თარიღზე მორიგდნენ და ეს დღე რომ დადგა, პორტუგალიური „პორტიმონენსეს“ განელი მცველის დასახვედრად კლუბმა ხალხი გააგზავნა აეროპორტში. მათ შორის გადამღები ჯგუფიც. მხოლოდ წითელი ხალიჩაღა აკლდა მთელ ამ ამბავს, მაგრამ ამაოდ ელოდნენ. ტყუილად აწვალეს კამერა და მიკროფონი, განელი არ გამოჩნდა. თვითმფრინავიდან არ ჩამოსულა და მოგვიანებით გაირკვა, რომ თურმე არც ასულა. პირი უტეხა პსვ-ს და ლისაბონის „სპორტინგში“ გადასულა. ოთხწლიანი კონტრაქტი გააფორმა და „სპორტინგის“ მაისურით ფიგუსა და რონალდუს შუაში გამოჭიმულმა სურათიც გადაიღო. ფინტიც ასეთი უნდა – მთელი გუნდი მოატყუა.
