• სად არის პატრიკ კლუივერტი?
  • ბოლო ცნობებით ის მილანში იყო, თუმცა, რას აკეთებდა იქ, არავინ იცის.
  • მაშინ რატომ არის კლუივერტი მილანში?
  • იმიტომ, რომ სხვაგან წასასვლელი მატარებელი ვერ აირჩია.
  • როგორ მოხვდა კლუივერტი მილანში?
  • შემთხვევით. მან და მისმა ძმაკაცმა უინსტონ ბოგარდმა სამხრეთში დასვენება გადაწყვიტეს, მილანში ჩასულებმა კი გაარკვიეს ,რომ იქ კურორტი არ ყოფილა.
  • სად არის ახლა ბოგარდი?
  • ბოგარდი ბარსელონაში წავიდა, რადგან გაიგო, რომ იქ უკეთესი დასასვენებელი ადგილია.
  • რატომ არ წაყვა მას კლუივერტი?
  • იმიტომ, რომ არავინ დაპატიჟა, ბოგარდი ხომ მიპატიჟებით გაემგზავრა.
  • ვინ მიიპატიჟა ბოგარდი?
  • ლუის ვარ გაალმა. მან თავის ასოცდამეშვიდე ბლოკნოტში ბოგარდის ტელეფონი იპოვა და გაახსენდა, რომ ამ ბიჭს იცნობდა.
  • საიდან იცნობდა ვან გაალი ბოგარდს?
  • ისინი ერთად ცხოვრობდნენ ამსტერდამში. ერთხელ გაზამ წიხლი ჩაარტყა ბოგარდს და ვან გაალსაც ასე დაამახსოვრდა. ბოგარდი სხვანაირად ვერაფრით მოხვდებოდა თვალში.
  • თუ ყველანი ამსტერდამელები არიან, რატომ არ ბრუნდება კლუივერტი ამსტერდამში?
  • იქ შეიძლება საციხოდ გაუხდეს საქმე. თანაც, იქ შოთაა და ასე იოლად აღარ ჩაესვლება. ესეც არ იყოს და, იქ ნაცნობები აღარ დარჩა, ედგარ დევიდსი და მიშა რაიციგერიც წავიდნენ.
  • სად?
  • თავიდან, ალბათ, მილანში ერთ-ერთი მაინც. ახლა კი ისინიც ბარსელონაში არიან. ეს საუკეთესო დასასვენებელი ადგილია ასეთი ბიჭებისთვის.
  • და სად არის კიკი მუსამპა?
  • სადღაც იქვე, შორიახლოს.
  • ნორდინ ვუტერი?
  • ვუტერმა ნაწნავები დაიშალა და ბერად აღიკვეცა.
  • რატომ?
  • იმიტომ, რომ სამხრეთში ვერ წავიდა დასასვენებლად.
  • ახლა რას ფიქრობს კლუივერტი?
  • ძნელი სათქმელშია, ფიქრობს თუ არა.
  • რა დარჩენია?
  • ფოჯაში ყოფილა კარგი დასასვენებელი ადგილი. თუმცა, გული ბარსელონასკენ მიუწევს, რადგან ძმაბიჭები იქ ისვენებენ.
  • ვერაფრით იშოვის ბარსელონაში წასასვლელ ბილეთს?
  • საეჭვოა, მგონი მაასტრიხტის ბილეთს სთავაზობენ, მაგრამ არ უნდა, სიცივეაო.
  • არსენ ვენგერი თუ იცნობს კლუივერტს?
  • იან რაიტი რომ მოკვდება, მერე გაიცნობს, თუ მანამდე გაბრიელ ბატისტუტა არ გაიცნო.
  • და რუუდ გულიტი?
  • გულიტი იცნობს, თვითონაც ნამყოფია სამხრეთში, მაგრამ არ ახსოვს, რომ იცნობს.
  • რა გაუკეთებია პატრიკ კლუივერტს?
  • ბავშვობაში კარგად თამაშობდა ფეხბურთს. რაც სრულწლოვანი გახდა, აღარაფერს აკეთებს, აკი გითხარით, სამხრეთში დასვენებას აპირებდა-მეთქი.
  • ჩვენ რაღა გვალაპარაკებს?
  • ალბათ ის, რომ მატარებელი არ უნდა შეგეშალოს და რახან ბავშვი ხარ, შინ უნდა დაეტიო.

14.02.1998

წილი
წინა სტატიაადრე ცემეს, ახლა ესროლეს
შემდეგი სტატიაუხანგრძლივესი, ნახევარსაათიანი თათბირი
გიო ახვლედიანი
გიო ახვლედიანს „სარბიელში“ ხუმრობით ცოცხალ კლასიკოსს ვეძახდით, თუმცა რაღა ხუმრობით, ერთი კრიტიკოსის აზრით, 90-იანი წლების ქართული პროზა გიო ახვლედიანის, იგივე აკა მორჩილაძის დროება იყო. „სარბიელში“, მაგალითად, ინგლისური პრემიერლიგის ამბებს მიმოიხილავდა ირაკლი გამყრელიძის ფსევდონიმით, საკრივო ამბებს კი ალბერტ ხაჩატურიშვილის სახელით. მეტწილად ცხოვრობს ლონდონში, „სარბიელში“ მუშაობისას კი მის ოთახში, კედელზე მიჭედებულ ლურსმანზე ეკიდა ჰოლმსისეული სამონადირეო ქუდი.