“სევილიამ” არგენტინელი მწვრთნელი ედუარდო ბერისო გაათავისუფლა. ბერისო ესპანურ გუნდში სულ შვიდი თვის მისული იყო. ერთი თვის წინ მან პროსტატის სიმსივნეზე იმკურნალა. სევილიელები ბერისოს, რომლის ხელმძღვანელობითაც გუნდი ჩემპიონთა ლიგის მერვედფინალში გავიდა, სადაც “მანჩესტერ იუნაიტედს“ უნდა შეხვდეს, ყოველმხრივ მხარში დგომას და ერთგულებას ჰპირდებოდნენ. ლა ლიგაში “სევილია” 17 თამაშიდან 29 ქულით მეხუთე ადგილზეა.
კლუბის მიერ გამოქვეყნებულ ოფიციალურ განცხადებაში წერია, რომ 48 წლის არგენტინელის სამსახურიდან გაშვების მიზეზი მიმდინარე სეზონში ცუდი სტარტია.
ედუარდო ბერისო “რივერ პლეიტსა” და ვიგოს “სელტაში” ცენტრალური მცველის პოზიციაზე თამაშობდა, შემდეგ კი მწვრთნელი გახდა და არგენტინულ “ესტუდიანტესს”, ჩილეს “ო’იგინსსა” და თავის ყოფილ ესპანურ გუნდ “სელტას” ედგა სათავეში.
ამრიგად, ჩემპიონთა ლიგის ფლეი-ოფში “მანჩესტერ იუნაიტედს“ სევილიელები უკვე ახალი მწვრთნელის ხელმძღვანელობით დაუპირისპირდებიან.
