• რამდენიმე შეკითხვა მაქვს.
  • „ინტერზე“ არ მკითხო და რაც გინდა ის იყოს.
  • კარგი. რატომ არის, რომ ხალხი ცხრა კაცითაც იგებს თამაშს, ჩვენ კი მთელი სტადიონი რომ ჩავიდეთ მოედანზე, ვაგებთ?
  • იმიტომ, რომ ჩვენ სხვანაირები ვართ.
  • ეგ რას ნიშნავს?
  • ეგ იმას ნიშნავს, რომ ჩვენ რუპერტ მერდოკს უნდა შევეკრათ.
  • ვინ არის რუპერტ მერდოკი?
  • მაგრამ რუპერტ მერდოკი ჩვენ არ შეგვეკვრება.
  • რატომ?
  • იმიტომ, რომ სხვანაირები კი ვართ, მაგრამ სუპერლიგაში არავინ გაგვიშვებს.
  • კვლავდაკვლავ რატომ?
  • იმიტომ, რომ ძაან სხვანაირები ვართ. ძაან სხვანაირების კი არ ესმით.
  • რაშია ეს სხვანაირობა?
  • ძალიან სხვანაირად ვთამაშობთ.
  • და რუპერტ მერდოკი ვინ არის?
  • კაცია, სუპერლიგას აარსებს. მთელს მსოფლიოში ეძებს ხალხს, ვისაც შეეკვრება.
  • და ჩვენ რატომ არ შეგვეკვრება?
  • აბა, რა გაქვს შესაკრავი? ჩვენი „შნუროკი“ არავის სჭირდება.
  • რაიო, ჩვენ ხომ ხიდი ვართ აღმოსავლეთსა და დასავლეთს შორის?
  • მაგ ხიდი ფეხბურთის თავზე გადადის.
  • როგორ?
  • როგორ და მაგ ხიდზე ფეხბურთელები არ დადიან.
  • მაშ, აბა ვინ შეგვეკვრება?
  • ალბანეთი შეგვეკვრებოდა, შესაკრავი რომ ჰქონდეს.
  • ეგეც ჩვენსავითაა?
  • არა, ჩვენ ვართ მაგათსავით.
  • ეს სიცრუეა! ჩვენ „აიაქსში“ ვთამაშობთ, ალბანეთი კი, არა.
  • „აიაქსი“ შორსაა. ახლოში კი რა ხდება?
  • სასიკეთო ძვრები.
  • აი, სულელი. თუ ვინმეს არ შეეკარი, ერთადერთი ძვრა მოხდება.
  • რომელი?
  • მიწისძვრა.
  • ეგ ფეხბურთთან რა კავშირშია?
  • პირდაპირ კავშირში, სტადიონი დაინგრევა.
  • რას ერჩი? მშვენიერი სტადიონია. აი, სკამებიც გვაქვს. ნამდვილი ის არის, რა ჰქვია?
  • „კამპ ნოუ“.
  • თუ „ნოუ კამპი“.
  • ჩვენს ბავშვობაში „ნოუ კამპი“ იყო, მაგრამ ახლა „კამპ ნოუ“ გამოდგა.
  • რითა ვართ მაგათზე ნაკლები?
  • მისმინე. ბარსელონაში არის გაჩიანის გადასახვევი?
  • არა.
  • ბარსელონაში, გადახურულში რომ დგახარ, გაწვიმს?
  • არა.
  • და ჩვენსა?
  • რა გინდა?
  • ისა, რომ მერდოკი არ შეგვეკვრება სანამ გადახურულში დგახარ და მაინც გაწვიმს.
  • და გაზა?
  • გაზასგან რა გინდა?
  • გაზა არ შეგვეკვრება? ხომ ბევრი ფული აქვს?
  • გაზა კი შეგვეკვრება, თუ პეროვზე ჩავატარებთ.
  • პეროვზე რატომ?
  • „გინესი“ იყიდება. ჩამოვუსხამთ და მეტი რა უნდა?
  • მერე, შევეკრათ, რაღას ვუყურებთ?
  • ეჰ… ეგ ისეთი ჩანს, აქეთ შეგვეკრება. დაგვილევს „გინესებს“ და დაიფსება.
  • მაშ, საშველი აღარ ყოფილა.
  • ჩვენ ხომ სხვანაირები ვართ? მოდი პელე მოვიწვიოთ.
  • ეგ რა ხეირს დაგვაყრის?
  • სულ არაფერს მაინც სჯობია.

3.10.1998

წილი
წინა სტატიაგცივა? იცეკვე!
შემდეგი სტატიააბსოლუტური პროდუქტი
გიო ახვლედიანი
გიო ახვლედიანს „სარბიელში“ ხუმრობით ცოცხალ კლასიკოსს ვეძახდით, თუმცა რაღა ხუმრობით, ერთი კრიტიკოსის აზრით, 90-იანი წლების ქართული პროზა გიო ახვლედიანის, იგივე აკა მორჩილაძის დროება იყო. „სარბიელში“, მაგალითად, ინგლისური პრემიერლიგის ამბებს მიმოიხილავდა ირაკლი გამყრელიძის ფსევდონიმით, საკრივო ამბებს კი ალბერტ ხაჩატურიშვილის სახელით. მეტწილად ცხოვრობს ლონდონში, „სარბიელში“ მუშაობისას კი მის ოთახში, კედელზე მიჭედებულ ლურსმანზე ეკიდა ჰოლმსისეული სამონადირეო ქუდი.