• უყურე ბრაზილია – არგენტინას?
  • უცნაური ხალხია.
  • რატომ?
  • აბა, რატომ უნდა ითამაშო ფეხბურთი დილის რვა საათზე?
  • ე, ეგ ეგრე გამოვიდა. იქ რომ ღამეა, აქ დილაა, ამდენი არ იცი?
  • მაგდენი როგორ არ ვიცი, მაგრამ ამ ბრაზილიელებს ტვინი არა აქვთ და…
  • ბრაზილიელებს? ჰმ…
  • ჰო, ბრაზილიელებს. ვეღარ გაიგეს, რომ არგენტინელებს არ უნდა ეთამაშონ?
  • აბა ვის უნდა ეთამაშონ?
  • ავსტრალიას. ჰა, ჰა, საუდებს.
  • და პელე რომ ჰყავდეთ, მაინც მოუგებს არგენტინა?
  • კიდევ კარგი, არა ჰყავთ.
  • ეს ვინა ყოფილა. რატომ?
  • პელე რომ ჰყავდეთ, ხომ მთლად სირცხვილით დაიწყვებოდნენ.
  • რატომ? პელემ თამაში არ იცის?
  • „პელე“ მე ყავა ვიცი და ისიც კაი ბითურული ყავაა.
  • ხედავთ რაებს ბედავს?
  • რაებს ვბედავ? კარგი ყავაა?
  • ყავა რა შუაშია, პელეზეა ლაპარაკი.
  • და „პელე“ ყავა არ არის?
  • პელე ფეხბურთის მეფეა. არ იცი?
  • ააა. იმ კაცზე ამბობ?
  • პელე „ის კაცია“?
  • არა, არა. პელე ის კაცი არ არის. ნამდვილად არ არის ის კაცი.
  • აბა, ვინ არის?
  • რა ვიცი, ვინ არის თვითონაც არ იცის.
  • ეგ როგორ?
  • როგორ და ამბობს დღესაც ყველაზე მაგარი ვარ ფეხბურთშიო.
  • მერე?
  • რაღა მერე, ყავაა და ამბობს ფეხბურთში ვარ მაგარიო. სად ყავა და სად ფეხბურთი.
  • ესე იგი, მარადონისტი ყოფილხარ. მარადონამ კიდევ ეფედრინი დალია.
  • შენ გინდა თქვა, რომ ყავის სმა შეიძლება და ეფედრინის არა?
  • თუ აკრძალულია…
  • თუ ძმა ხარ. რაც აველანჟს ეფედრინი დაულევია, ვინ დათვალა?
  • და აველანჟი ხომ არ თამაშობს ფეხბურთს?
  • ნეტავ ეთამაშა. ახლა ვეტერანი იქნებოდა. გავაცილებდით.
  • მაინც ხომ მიდის?
  • არ მჯერა.
  • რატომ?
  • პელემაც თქვა წავედი, მარადონამაც თქვა, წავედიო და არც ერთი არ წასულა.
  • პელე წავიდა. ხომ გააცილეს?
  • ეგ არ მაინტერესებს. მე შენ გეკითხები, რატომ ეთამაშებიან ბრაზილიელები არგენტინელებს?
  • არ ვიცი.
  • მე კიდევ ვიცი. იმიტომ ეთამაშებიან, რომ კიდევ ერთხელ დაგვარწმუნონ, „პელე“ არის ყავა და…
  • და მარადონა ეფედრინი?
  • არა, აველანჟი არის ეფედრინი.
  • და გაზა?
  • რა შუაშია აქ გაზა…
  • პელე თუ ყავაა და მარადონა თუ ეფედრინი, გაზა რაღა გამოდის?
  • გაზა ხომ გადმოვარდა.
  • საიდან?
  • აივნიდან, ბავშვობაში. თავით დაეცა.
  • მერე?
  • მერე გაიცინა.
  • ამით რისი თქმა გინდა?
  • იმის, რომ ფეხბურთი ყავა არ არის.
  • ისევ ბრაზილიაზე ამბობ?
  • მე ვამბობ, რომ სამართალმა ეფედრინი ჭამა, ანუ პასარელამ ბრაზილია ჭამა, ანუ ეფედრინმა აველანჟი ჭამა, ანუ სამართალმა… გაიგე?

02.05.1998

წილი
წინა სტატიაქორწილი არ იქნება
შემდეგი სტატიაკალათბურთი ახალი თავისთვის ემზადება
გიო ახვლედიანი
გიო ახვლედიანს „სარბიელში“ ხუმრობით ცოცხალ კლასიკოსს ვეძახდით, თუმცა რაღა ხუმრობით, ერთი კრიტიკოსის აზრით, 90-იანი წლების ქართული პროზა გიო ახვლედიანის, იგივე აკა მორჩილაძის დროება იყო. „სარბიელში“, მაგალითად, ინგლისური პრემიერლიგის ამბებს მიმოიხილავდა ირაკლი გამყრელიძის ფსევდონიმით, საკრივო ამბებს კი ალბერტ ხაჩატურიშვილის სახელით. მეტწილად ცხოვრობს ლონდონში, „სარბიელში“ მუშაობისას კი მის ოთახში, კედელზე მიჭედებულ ლურსმანზე ეკიდა ჰოლმსისეული სამონადირეო ქუდი.