• აღარ ვიცი, რა ვიფიქრო?
  • რატომ?
  • მთელი სეზონი ვყვიროდი “იუვე”, “იუვე”, “იუვე” და რა გამოვიდა?
  • სულელი ყოფილხარ.
  • ჩირო რომ მომჯობინებულიყო, სხვანაირად არ იქნებოდა?
  • ეგრე დი სტეფანო და ხენტოს რომ ეთამაშათ…
  • კარგი, ერთი, „რეალი“ გუნდია?
  • და „დორტმუნდი“?
  • ამით რისი თქმა გინდა?
  • ამით იმის თქმა მინდა, რომ „იუვენტუსს“ ერთი უცნაური თვისება აქვს. მოედანზე ხან თერთმეტი ზიდანია, ხან თერთმეტი დი ლივიო.
  • და დელ პიერო?
  • ძალიან მწყდება გული, რომ დელ პიერომ არ ითამაშა. მაშინ ხომ აღარ გექნებოდათ სალაპარაკო, „იუვეს“ ბალეშჩიკებს, დელ პიერო არ გვყავდა და იმიტომ წავაგეთო.
  • დელ პიერომ როგორ არ ითამაშა. იქ არ იყო?
  • სად?
  • „ამსტერდამ არენაზე“.
  • ტრიბუნაზე თუ იჯდა, არ ვიცი, და მოედანზე არ იყო.
  • როგორ არა?
  • მოიცა, მოიცა… გავიხსენო. არა, ის ტორიჩელი იყო. არა, არ უთამაშია.
  • კარგი ერთი. თვალებში ნაცარს მაყრი?
  • მე გაყრი თვალში ნაცარს? მე თუ მკითხავ, ლიპი გაყრის მაგ ნაცარს.
  • რატომ?
  • მესამე წელიწადია, გატყუებს. ზედიზედ სამჯერ გახვიდე და ვერ მოიგო?
  • სამჯერ რატომ? ორჯერ. „აიაქსს“ ხომ მოუგეს?
  • მაგათ თუ „აიაქსს“ მოუგეს, მაშინ შენ ნამუსი აღარ გქონია.
  • აბა, ჰაინკესს აქვს ნამუსი?
  • იმის ნამუსი მაინც აქვს, რომ ყოველ წელიწადს ფინალში არ გავიდეს და იქედან შერცხვენილი არ დაბრუნდეს. უკვე ფინალების ყურების მეშინია.
  • რატომ?
  • დამთავრდება და დაინახავ ლიპის. ცხვირ-პირი ჩამოსტირის, უჭირავს ის თავისი სიგარა და იყურება შორს. აღარ მოგბეზრდა?
  • „იუვე“ გუნდი არ არის?

    მარჩელო ლიპი და რობერტო ბაჯო
  • „იუვე“ ჩემპიონია.
  • მერე?
  • მერე ფინალისტია.
  • მერე?
  • მერე დი ლივიოა, კონტეა, მონტეროა, ტორიჩელია, დეშამპია, აქ თავდება ბაზარი.
  • რატომ?
  • იმიტომ, რომ ბაჯო “„ბოლონიაშია“.
  • და გაზა?
  • რა შუაშია გაზა?
  • გაზას რომ ეთამაშა „იუვეში“, რა იქნებოდა?
  • სერია B.
  • რატომ?
  • გაზა ხომ დავიდსი არ არის, დაეზარებოდა.
  • ზიდანსაც ხომ ეზარება ხოლმე?
  • ეჰ, ზიდანს გაზას როგორ შევადარებ. სად გაზა, სად ზიდანი.
  • რა საკითხში?
  • არ გინდა ეს პროვოკაციული შეკითხვები. საგაისოდ გაემზადე.

23.05.1998

წილი
წინა სტატიარატომ გაიაფდა მესი?
შემდეგი სტატიავერცხლის კუნძული
გიო ახვლედიანი
გიო ახვლედიანს „სარბიელში“ ხუმრობით ცოცხალ კლასიკოსს ვეძახდით, თუმცა რაღა ხუმრობით, ერთი კრიტიკოსის აზრით, 90-იანი წლების ქართული პროზა გიო ახვლედიანის, იგივე აკა მორჩილაძის დროება იყო. „სარბიელში“, მაგალითად, ინგლისური პრემიერლიგის ამბებს მიმოიხილავდა ირაკლი გამყრელიძის ფსევდონიმით, საკრივო ამბებს კი ალბერტ ხაჩატურიშვილის სახელით. მეტწილად ცხოვრობს ლონდონში, „სარბიელში“ მუშაობისას კი მის ოთახში, კედელზე მიჭედებულ ლურსმანზე ეკიდა ჰოლმსისეული სამონადირეო ქუდი.